జాలరి పదాలు

చేపలు కోసం వల అల్లినట్టు
సాగరం కోసం
రోజొక కొత్త పాట అల్లుతాడు
జాలరి

*
జాలరి కి కెరటాలు
మంచి దోస్తులు
తీర సముద్రాల మధ్య
వారధులవి!

*

సాగరం లోతెంతో
తెలియాలంటే
జాలరి తో మాటలు కలపాలి
వాళ్ళ పాటలు వినాలి

*

తనలో ఉప్పు ఎందుకు కలిసిందో
సముద్రం తో కాదు
జాలరి
చెమటను అడగాలి

*

జాగ్రత్తగా వింటే
సముద్ర ఘోషలో
జాలర్ల భార్యాపిల్లల
గుండె లయ వినిపిస్తుంది

*

తుపానుల జాడ కోసం
సాగర ఉపరితలంమ్మీద కంటే
ముందు జాలరి
లోగిలిలో వెతకాలి

*

జాలరి బతుకు వెతలు
మనకంటే బాగా
సముద్రానికి తెలుసు
జాలరి- సముద్రం తోబుట్టువులు

*

జాలరి బతుకు నావ
ఊగిసలాట సాగరానికి అర్థమైతే
ఎంత బాగుండు
ఆటుపోట్ల ను కడుపులోనే దాచుకునేది కదా!

*

వాళ్ళ ఆశ సాగరం
కలత ఆటుపోటు
నిదుర సుడి లోతు
మెలకువ బరువైన నిట్టూర్పు
జాలరి జీవితం సగం నావ
సగం తీరం…