ఉఛ్వాస నిశ్వాస ఉప్పెనల్ని ఆపగలడా వాడు..?

వాడు
పూవులన్నిటిని చిదిమి
వసంతాల్ని రాల్చేశానంటాడు..

వాడు
దారులన్నింటిని మూసి
గాలిని బంధించానంటాడు..

వాడు
వేలాది వీరుల గుండెల్ని
తూట్లు పొడిచిన
తుపాకుల్ని తూర్పుకు లోడుచేసి
సూర్యోదయాల్ని పాతరేశానంటాడు..

వాడు
అడవి గుండెలపై
ఆయుధ గిడ్డంగులు డంపుజేసి
చెట్టు పుట్టా పురుగూ పుట్రానెల్లా
చెడుగాడానంటాడు..

వాడు
ముచ్చెమటలు పట్టిస్తున్న
విల్లంబుల ధృతికి జడిసి
కరోనాలు కడుపు దాచిన
డ్రోన్ల దొంగ దాడులు
తన విజయమని బుకాయిస్తాడు..

తోకలేని గాలిపటాల
అర్థంలేని శతకాల
పిలుపు మేలుకొలుపులు
మీడియా మెసేజులై
పలాయన కూనిరాగాలాలపిస్తుంటే..

ఆపరేషన్ సమాధాన్
కోరలు పదునెక్కించి
ప్రగతికి మార్గాలు
సుగమమైనాయంటాడు..
అభివృధ్ధికి ధ్వారాలు తెరుచుకున్నాయంటాడు..

పాశవిక ప్రహార్ల
పదఘట్టనల కింద నలిగి
కనురెప్పలపై
కాళరాత్రుల్ని మోస్తున్న కన్నతల్లుల
పచ్చినెత్తుటి పొత్తిళ్ళ శపథాలు వినగలడా వాడు..!!

సవర గూడాల్ని
శవాల గుండాలు జేసి
బతుకో గండం జేసినా
తూటాల వానయ్యీ
వెదురు పాకల నెగడు నిప్పుల్ల
ఊపిర్లు బిగబట్టి
పాలుదాగుతున్న పసిబిడ్డల
బిగుపిడికిళ్ళు పురుడు పొసే
ఉఛ్వాస నిశ్వాస ఉప్పెనల్ని
ఆపగలడా వాడు…??

ఇక్బాల్

పుట్టిన ఊరు కొల్లాపూర్ - వరిదేలవీధి(1960లో), ఇప్పటి నాగర్ కర్నూల్ జిల్లా. నేపథ్యం: దోయబడ్డ బాల్యం, కష్టాలు కన్నీళ్లు, ఆకలి అవమానాలే తోబుట్టువులు. చెమట సౌరభాల మడి అమ్మవడే బడిగా... తలాపున నల్లమల అడవే ఆట మైదానంగా... ఎలుగెత్తి పారే కృష్ణా నది చేతికందే దూరంలో ఉండీ గొంతు తడవని దాహంతో ఏళ్లకేళ్లు కురవని మేఘాలతో పరుగు తీసే మేకలతో, చెట్టు పుట్టలతోచెట్టా పట్టాలేసుకు సాగిన సాహచర్యం. వృత్తి: న్యాయవాదం. ప్రవృత్తి : సాహిత్య అధ్యయనం. 1978 నుండి కవిత్వం, పాట, వ్యాసం, కథా, చిత్ర, నాటిక రచన, నటన. రచనలు : 1. 'స్పందన'( కవితా సంకలనం) 1985 గద్వాల్ విరసం రాష్ట్ర సభల్లో ఆవిష్కరణ. 2. 'సేద్యం' (కవితా సంకలనం), 3. 'కఫన్' (కథా సంకలనం), 4. సాంగ్ ఆఫ్ ఫర్రోస్ (కవిత్వం) ( ఆంగ్లానువాదం: అర్విణి రాజేంద్రబాబు గారిచే), 5. 'రాహేc', 6. 'జాబిలి ఖైదు', 7. 'దగ్ధ స్వప్నం' (కవితా సంకలనాలు ప్రచురించారు.)