ఆకాంక్ష

శిశిరం లో రాలిన ఆకులు
గలగలంటున్నాయ్
వాడి గుండెల్లో అలజడి
అడుగులెవరివని

కలంలో కాలాన్ని
ప్రశ్నించే అక్షరాలు తూటాల్లా
దూసుకొస్తుంటే
బుల్లెట్ ప్రూఫ్ అద్దాల మాటున
వాడు కాపురం

వసంతంలో చిగురిస్తున్న
మొక్కల మాటున
దాగే ప్రశ్న
విరుచుకుపడుతుందని
వాడి వెన్నులో వణుకు

నాటిన ప్రతి మొక్క
ఓ ఆయుధ భాండాగారమౌతుందేమోనని
కలవరింత
కాకులే కాపలాగా
అరిచే అరుపు
ఎరుపై మూకుమ్మడి దాడి చేస్తారేమోననే
భావి స్వప్నం
వాడ్ని నిదుర పోనీయట్లేదేమో

శరదృతువు లో
కాచే వెన్నెల్లో
పల్లె బతుకుల్లో వెలుగులు నింపే
దారులు వెతికే పనుల్లో సేద్యగాళ్ళు

వాడ్ని
నిలువెత్తు గొయ్యిలో
పాతరేసి హేమంతాన్ని ఆహ్వానిద్దామనే
ఆకాంక్ష నేడు కాక పోయినా రేపైనా
నెరవేరుతుంది లే

చెలమల్లు గిరిప్రసాద్

పుట్టింది సూర్యాపేట. పెరిగింది నాగార్జున సాగర్. ఇండస్ట్రియల్ ఇంజనీరింగ్ అండ్ మేనేజ్ మెంట్ లో పోస్ట్ గ్రాడ్యుయేట్. విద్యార్థి దశలో ఎస్. ఎఫ్. ఐ. లో పని చేశారు. సామాజిక ఆర్థిక సమస్యలను కవితా వస్తువులు గా తీసుకుని  కవిత్వం రాస్తున్నారు.  వివిధ పత్రికల్లో ప్రచురితమయ్యాయి.