కలాష్నికోవ్

మన వాడల చనుబాల నిండా
నీ పరిమళమే…
నరాలు పాడే గీతానికి
డప్పులో పొదిగిన కంఠానికి
నెర్రల నేల ఊపిరికి నీ రూపమే..

నిషిద్ధ చరిత పుటల మీద
నెత్తుటి అడుగులుగా నీవే…
పల్లవించిన మన పోరులో అంతఃసూత్రమయ్యీ నీవే…

“కరువు నేల కలగన్న”
జీవనదివి నీవే..
నడిగడ్డ గుండెన కలాష్నికోవ్
మొలకవి నీవే..
నల్లమల ప్రాణ చలన శీలతవి
నీవే…
నీ పేరే పోరు “సత్యం”

విశ్వాసాలు చీకటైనప్పుడు
తోవ శిశిరమై తెగినప్పుడు
నువ్వొస్తావు…
కాంతిలా కెరలుతూ…
పూసే వసంతమై గుబాళిస్తూ
నువ్వొస్తావు.
నీ పేరే అమరవీర “సత్యం”

(కర్రెం నర్సప్ప (సత్యం) స్మృతిలో)