”మా…”

పుర్రెనిండా
పరాయితనం దాచుకొని
ఎన్నాళ్ళు నన్ను కౌగిలించుకున్నా ఎప్పటికీ నేను నీకు
గులాబీనే చేతికివ్వాలనే అనుకుంటాను
పువ్వు కింద ముళ్లు నా కుట్ర అంటావు
గుచ్చుకునే ముళ్లు వెతుక్కుంటూ
విచ్చుకునే పూలపరిమళాలు నువ్వెప్పటికీ స్వాగతించలేవ్…

నేనీదేశపు పౌరునిగా నిలబెట్టుకోడానికి
నన్ను నేను ఎన్నిసార్లు కూల్చుకున్నానో
నీ మనువు ముందు ఎన్నిసార్లు రాజీపడిపోయానో
శతాబ్దాల సాహచర్యంలో
నేను ప్రకటించిన ప్రేమను
నువ్వు లొంగుబాటని అనుకొనివుంటావ్

నాకు తెలుసు
నన్ను వెతుక్కుంటూ
ఏదోఒక రోజు వస్తావ్
ఘర్ వాపస్ రమ్మంటానికో
దేశం విడిచి పొమ్మంటానికో
శరణార్ధి శిబిరాలలోకి విసిరేయటానికో

నాకు తెలుసు
నన్ను వెతుక్కుంటూ
ఏదో ఒకరోజు వస్తావ్
పాకిస్తాన్కొ లేదంటే
ఆఫ్ఘనిస్తాన్ కొ
నాదికాని ఏ దేశానికో
నా వాళ్లులేని ఏ ప్రదేశానికో నువ్వు వెళ్లమంటావ్

ఎప్పుడూ టైలర్ గానే మిషను తొక్కాను
నా పూర్వీకుల దారంపోగుల అల్లికనెలా నిరూపించుకోగలను?
ఎప్పుడూ నా రైంచీల బిగింపులకొ సమ్మెట దెబ్బలలో మసకబారిన
నా జిందగీకి జుర్మానాలా
దృవీకరణ ప్రత్రాలు ఎక్కెడ నుంచి తెగలను?
ఖాన్దాన్ అంతా కిరాయ్ మకాన్ లోనే వున్నవాళ్లం
ఇప్పుడు నా దేశమే నాకు కిరాయ్ మకాన్ అంటే ఎక్కడికెళ్లగలను ?

అడుగడుగునా అమానవీయ అగాధాలు దాటి నన్ను నేను ప్రతీ పూటా
నా భారతీతను నిరూపించుకోలేను
ఇప్పుడు నేను నా తల్లి కడుపులోకి తిరిగి వెళ్లిపోవాలనుకుంటున్నాను

మా మేరే వతన్ తేరే సీనేపే ముఝే జాగా నహీ
తేరే పేట్మే ముఝే లేలే…

నబి కరీం ఖాన్

పుట్టిన ఊరు ఒంగోలు.  అసలు పేరు కరిముల్లా ఖాన్.  కలం పేరు నబి కరీంఖాన్. కార్మికుడు, సామాజిక కార్యకర్త, కవి. పదో తరగతి వరకు చదువుకున్నారు. కమ్యూనిస్టు కుటుంబంలో పుట్టారు. CPMలో కొంత కాలం క్రితం వరకు సభ్యునిగా ఉండి పార్టీ ప్రజా సంఘాలైన యువజన, మైనారిటీ ప్రజా సంఘాలలో పనిచేశారు. అనారోగ్యంతో మరణించిన తన పెద్దన్నయ్య నబిఖాన్  ఉద్యమ స్ఫూర్తిని కొనసాగించేందుకు, తన క్షరాలలొ అన్న బతికే వుండాలని ఆకాంక్షతో వారి పేరును కలం పేరుగా పెట్టుకున్నారు. రచనలు: నిషిద్దాక్షరాలు(కవితా సంకలనం. రఫీ అనే మిత్రుడితో కలిసి 2003లో), వేకువకోసం (దీర్ఘ కవిత. 2007లో), ధోకా (దీర్ఘ కవిత. అముద్రితం). ఐదు కథలు రాశారు. అవి కథామినార్, మాతృక, ప్రియదత్త, ఆకాశవాణిలో ప్రసారం, ప్రచురితమయ్యాయి. 'గుజరాత్ గాయం' సంకలనం(2002) నుండి 'ముఖామి'(2017) వరకు అనేక ముస్లింవాద కవితా సంకలనాలలో నబి కరీంఖాన్ కవిత్వం ప్రచురితమైంది.