దండకారణ్యంలో ఆపరేషన్ కగార్

పల్లవి : ధనధన తుపాకి మోతల నడుమా
దండకారణ్యం – అదిగో దండకారణ్యం
ఆదివాసుల బతుకులపైనా
కగార్ అంటూ యుద్ధం అడవిని కాజేసే యుద్ధం
ఈ యుద్ధం ఆపేద్దాం
అడవి బిడ్డలను రక్షిద్దాం ||ధనధన||

ఎందుకు బార్డర్ పోలీసంతా
గూడాలను చుట్టు ముట్టినయ్
అడుగడుగునా బేస్ క్యాంపులతో
దండయాత్రనే తలపించినయ్
పక్షుల బదులు ఎంతటి వింతా
డ్రోన్లు గద్దలై ఎగురుతున్నయి
వెలుగుల బదులు నెత్తుటి ముద్దలు
విషాదంగా ఉదయిస్తున్నయి
బిడ్డను గుర్తు పట్టని తల్లుల
గుండెలు పగిలాయా – అరణ్య రోదన అయ్యాయా ||ధనధన||

ఎందుకు హస్దేవ్ అడవులు మనకు
ప్రాణ వాయువును పంచొద్దంటూ
చెట్లను నరికి బొగ్గుబావులను
అదాని కంపెనికివ్వాలంటా
అడవిని తొవ్విన ఖనిజ సంపదా
కార్పొరేట్లకే చెందాలంటా
కాదనిచెప్పి ఎదురు తిర్గితే
కాల్చిచంపడమే మార్గమంటా
అది మారీచుల మాయలేడని
చెబితే తప్పంటా- చేదునిజాలు వద్దంటా ||ధనధన||

ఎందుకు రాజ్యాంగానికి తూట్లు
అటవీ చట్టం అమలవ్వదులే
గ్రామసభలకే అధికారాలనె
పెసా చట్టం కానరాదులే
శాంతి చర్చలకు తయారంటునే
పాలకులెవ్వరు ముందుకు రారు
పర్యావరణం తియ్యటి మాటలు
పాలపొంగులై పోతాయిలే
ప్రజలపైనే యుద్ధం చేస్తే
ఆకలి పోతుందా – అడవి మారిపోతుందా

ధనధన పోలీస్ తుపాకి మోతలు
ఆగిపోవాలి శాంతికి బాటలు వేయాలి
చెదిరిపోయిన గూడెం ప్రజలు
గూటికి చేరాలి – పనిపాటలు సాగాలి
జల్ జంగల్ జమీన్ మీదా
ఆదివాసులకే హక్కులుండాలి

(‘ఆపరేషన్ కగార్’ నిలిపివేయాలంటూ 18మే, 3024న హైదరాబాద్ లో పౌరహక్కుల సంఘం, సిడిఆర్ఓ సంస్థలు నిర్వహిస్తున్న సభ సందర్భంగా…)

మిత్ర

పుట్టింది కరీంనగర్ జిల్లా వేములవాడ. కవి, రచయిత, గాయకుడు. విప్లవోద్యమ నాయకుడు. అసలు పేరు కూర దేవేందర్. కలం పేరు మిత్ర. అమర్ పేరుతో సీపీఐ(ఎం.ఎల్.) జనశక్తి రాష్ట్ర కార్యదర్శిగా పనిచేశాడు. రచనలు : 1. మిత్ర తెలంగాణ పాటలు, 2. పొదుగు, 3. వరుపు, 4. మిత్ర జనం పాటల సవ్వడి (పాటలు); 5. చితాభస్మంలోంచి...(కవిత్వం); 6. తెలంగాణ డప్పు దరువు, 7. తెలంగాణ ధూం ధాం, 8. తెలంగాణ కోలాటం పాట, 9. ముంబై తెలంగాణం, 10. బహుజన బతుకమ్మ, 11. వీరతెలంగాణ (నృత్యరూప గానాలు).