రక్తంతో గీసిన సరిహద్దు గీతతో
రెండు వీధులూ రెండు తలలుగా గల
ఒక శరీరమే ఊరు.
ఒక వైపు తోక తొక్కితే
రెండవ వైపు పడగవిప్పి ఆడుతూనే ఉంది
గాలి నల్లగా వీయడం మానలేదు
నీరు శిలలా గడ్డకట్టటం ఆగలేదు
కాకుల ఆత్మహత్యతో
చెట్లు ఏకాకిలయ్యాయి.
శబ్దం సన్యాసాన్ని స్వీకరించి
శూన్యాన్ని పరిచింది
కులం కమురువాసన కప్పేసిన
ఊరు ముఖంలో మసకబారిపోయింది
మనిషి ఉనికి.
స్మశానానికి విడిదిగా మారిన నిశ్శబ్దంలో
ఊరి నడిబొడ్డున వేలాడే కులం కత్తి
మనసులను చంపి
మనుషులను శవాలుగా బ్రతికించాలని
అలాగే గురిపెట్టే ఉంది .
