Author: సింగరాజు రమాదేవి

కవయిత్రి, కథా రచయిత, అనువాదకురాలు.  వరంగల్ వాస్తవ్యులైన వీరు, ముప్ఫై ఏళ్ళ పాటు భారతీయ జీవిత బీమా సంస్థ లో పని చేశారు. పలు ప్రముఖ దిన, వార, మాస పత్రికలలో, వెబ్ పత్రికలలో వీరి కథలు, కవితలు, వ్యాసాలు, అనువాద కథలు ప్రచురితం అయ్యాయి. పలు నాటికలు, గేయాలు, పుస్తక సమీక్షలు, సినీ విమర్శ వ్యాసాలు కూడా రచించారు. మానవ సంబంధాలు , సమకాలీన సమస్యలు, సమాజంలో కొత్త పోకడలు, అన్ని రకాల వివక్షలు వీరి కథా వస్తువులు. ఆగస్ట్ 2014 లో తొలి కథా సంపుటి ‘ఒక పరిచయం... ఒక పరిమళం’, ఆగస్ట్ 2025లో రెండవ కథా సంపుటి ‘ఔను నాకు నచ్చలేదు’ విడుదల చేశారు. జెండర్, వర్గ దృక్పథంతో పలు సమకాలీన సామాజిక అంశాలపై అనేక వ్యాసాలు రాశారు. నేటి తెలుగు సినిమాలలో హీరో పాత్ర చిత్రణ పై వీరు రాసిన ‘పురుషత్వానికి ఒక ప్రమాదకర నమూనా- తెలుగు సినిమా హీరో’ వ్యాసం, అన్వేషి సెంటర్ ఫర్ విమెన్స్ స్టడీస్ వారు డిగ్రీ విద్యార్థుల కోసం రూపొందించిన జెండర్ టెక్స్ట్ బుక్ ’ టువర్డ్స్ ఎ వరల్డ్ ఆఫ్ ఈక్వల్స్’ లో పాఠ్యాంశంగా చేర్చారు. 2004 లో, అణగారిన వర్గాలకు చెందిన పిల్లలపై కథలతో, అన్వేషి సంస్థ వారు ప్రచురించిన ’వాడపిల్లల కథలు’ పుస్తకం కోసం రెండు కథలు అనువదించారు. 2022 లో విడుదలైన రెండు ప్రముఖ స్త్రీవాద కవితా సంకలనాలు ’సంఘటిత’, ’అపరాజిత’ లో వీరి కవితలు చోటు చేసుకున్నాయి. డా. మాడభూషి రంగాచార్య స్మారక సంఘం, హైదరాబాదు వారు 2024 లో ప్రచురించిన ‘నేటి కాలపు మేటి కథకులు’ నాలుగవ సంపుటి పుస్తకంలో ప్రముఖ రచయత్రి ఇంద్రగంటి జానకీబాల గారి కథలపై విమర్శ వ్యాసం రాశారు.