వందల ఏళ్లుగా ఊరికి దూరంగా
వెలివేయబడ్డ మాదిగ లందలో
ఉదయించిన నల్లపొద్దతను!
మనువు డొక్కచీరి డప్పు కట్టి
ఆకలిమంటలపై కాపి
వాడవాడల సిర్రా చిటికెన పుల్లతో
దరువేస్తున్న దండోరా శబ్దం!
నల్లమల వీచిన గాలుల్ని పసులకాడ పిల్లనగ్రోవిపొత్తిలో నింపుకొని
రేలపాటల్లో ఓనమాలు దిద్దిన
శంభూకుడతడు!
తెగ్గోయబడ్డ గొంతుకలకు
చూపుడు వేలెత్తే
జ్ఞానాయుధాన్ని అందించిన
తధాగతుడతను!
అంటరానిగాలి నేరమయినచోట
సుద్దముక్కలతో సుద్దులు బోధించే నల్లబల్లతను!
బాధల కొలిమిలో భావానికి ఫుటంబెట్టి చేతిలో
కరవాల కాలంతో
నడుస్తున్న తెలంగాణతను!
(విరసం కార్యదర్శి కాశీంపై కుట్ర కేసుకు నిరసనగా…)
