వినబడని పాటను

ఊరి నడుమన ఉండీ
ఊరితో మాటైనా కలవనట్టు
లోనంతా డొల్ల డొల్లగా
ఖాళీ చేయబడిన ఇల్లులా..

నాకు నేను అల్లుకున్న
విష పరిష్వంగంలో
చిక్కు చిక్కుల ఉండల్లో
ఇరుకునబడి స్పృహ తప్పినట్టు..

ఎప్పుడో ఒకప్పుడు నేనూ
నవ్వుల పువ్వుల చెరువునే
ఇప్పుడేమో రాతిబొమ్మనైతి
కళ్ళు కానకుండా ఉంటిని…

దూరాల నుండి నిర్జన వారధి
నేను కదిలితే చాలు.
ఎటైనా దాటించేయాలని
పాదాలు మోపగానే హత్తుకోవాలని..

చూపుకు ఊపు తగ్గిందేమో
మనసుకు మర్మం సోకిందేమో
అభావానికి ముభావం తోడై
రాని రాగాన్ని సాగదీస్తునట్టు..

అతుకులు పడిన అంగీలా
శూన్యపు అంచులకు జెండాలా
ఉరికొయ్యకు ఊగే ఉయ్యాల్లా
ఇప్పుడు ఏమీ కాని నేను
వినబడని పాటను!
ఉనికి లేని ఊటను!!

అనిశెట్టి రజిత

పుట్టింది వ‌రంగ‌ల్ జిల్లా హ‌న్మ‌కొండ‌. క‌వి, ర‌చ‌యిత‌. విద్యాభ్యాసం వ‌రంగ‌ల్‌లో. బాల్యం నుంచే సాహిత్య‌- ఉద్య‌మాల ఆస‌క్తితో నాటి 'జై తెలంగాణ' ఉద్య‌మం మొద‌లు, మొన్న‌టి ప్ర‌త్యేక తెలంగాణ ఉద్య‌మం వ‌ర‌కు వివిధ సాహిత్య, ప్ర‌జా సంఘాలు, ప్ర‌జాస్వామిక‌ ఉద్య‌మాల‌తో మ‌మేక‌మ‌వుతున్నారు. 12 స్వీయ ర‌చ‌న‌ల గ్రంథాలు, 18 కు పైగా వివిధ సంక‌ల‌నాల‌కు సంపాద‌క‌త్వం వ‌హించారు. 'రుద్రమ ప్రచురణలు' 2012 నుండి నిర్వహిస్తున్నారు. గత దశాబ్ద కాలంగా 'ప్ర‌జాస్వామిక ర‌చ‌యిత్రుల వేదిక' లో వివిధ బాధ్యతలు నిర్వహిస్తున్నారు.