(సైమన్ ఆర్మీటేజ్)
మళ్ళీ యుద్ధమొచ్చింది : బాంబులదాడిలో
ధ్వంసమైన ఇంట్లో ఓ కుటుంబం
కాలిపోతున్న పైకప్పు కింది నుండి
తమ జీవితాల్ని బయటకు మోసుకెళ్తుంది.
తర్వాతి దృశ్యం పాత న్యూస్ రీల్ లా ఛళ్ళున చరుస్తుంది:
రద్దీతో కిటకిటలాడే ప్లాటుఫారంలు, రైళ్లు
(మళ్ళీ వద్దు, వద్దే వద్దు) తలలమీదుగా
బుజాలమీదుగా అందించుకునే పిల్లలూ,
లగేజి మూటల్లో కుక్కుకున్న జీవితకాలాలు.
మళ్ళీ యుద్ధమొచ్చింది: దగ్గరి దిగంతాల
మీద పొగమంచులా భ్రమించినా,
స్పష్టంగా పైకెగుస్తున్న నల్లని దట్టమైన పొగ.
గుండెల్ని అరచేతుల్లో పెట్టుకుంటాం.
ఓ పాత నీలిరంగు ట్రాక్టర్ మిలిటరీ ట్యాంకును
ఎవరిదీ కానీ భూమిలోనికి ఈడ్చుకొస్తుంది.
ఇది యుద్ధవిరమణ సమయం:
బారులు తీరిన ఉన్ని కోట్లకు, టోపీలకూ
శుభం కలుగుగాక
కూలిన వంతెనల వేలాడే తీగలపై వణుకుతూ
సూట్ కేసుల్నీ సంచుల్నీ మోస్తూ
తూర్పు పడమరల్ని కలుపుతూ
నడిచే వాళ్లకూ
జయం కలుగుగాక.
మళ్ళీ యుద్ధమొచ్చింది:
నల్ల దుస్తులు ధరించిన స్త్రీ ఒకామె
సైనికునికి సూర్యకాంతం పువ్వుల విత్తనాలిచ్చి
అతని మూలుగ జాతీయపుష్పానికి జవజీవాలంటుంది.
కలల్లో బుల్లెట్లు పక్షులుగా మారనీ,
బాంబుల గుత్తులు పుష్ప గుచ్చాలవనీ.
కనికరాన్ని కత్తిరించేసిన వార్తలు అబద్దపు వార్తలే.
మళ్ళీ యుద్ధమొచ్చింది:
గాలిని చీల్చే సైరన్ కూత
మోగుతున్న చర్చి గంటలను
గొంతు నొక్కలేదు.
దాన్నే మనం ఆశ అందాం.
(తెలుగు అనువాదం: నారాయణస్వామి వెంకటయోగి)
