కవిత్వ రహస్యం

నక్షత్రాలని కబళించిన
రాబందు ఆకాశం రెక్కల కింద
ఏకాకి నిట్టూర్పు

కన్నీళ్ళ కొలిమిలో రగిలే ఒంటరి క్షణాలు
ఒంటరి క్షణాల కత్తి గొంతుపై వేలాడే కాలం
కాలం నాలుగు గోడల మధ్య బందీయైన శాశ్వత శిశిరం
శిశిరమై పరుచుకున్న సూర్యోదయం జాడ లేని సుదీర్ఘ నీరవ నిశీధి
నిశీధి మానని గాయమై సలిపే నిరాశ

నిరాశ చీకట్లలో
కొడిగట్టని కొనవూపిరి దీపం
విస్తరించే ఎడారులలో
ఇంకిపోని లోలోపలి సముద్రం

ముళ్ళకంచెల మధ్య
మొలకెత్తే ఇంద్రధనుస్సు
చిత్రహింసల సంకెళ్ళలో
శ్వాసించే జీవ రవళి
చిట్టచివరి బందిఖానా శిథిలాలపై
కువకువలాడే స్వేచ్ఛా విహంగం
అవనతంకాని మానవతాపతాకం

సుధా కిరణ్

పుట్టి పెరిగింది ఖమ్మం జిల్లాలో. ఇంజనీరింగ్ చదువూ, ప్రస్తుత ఉద్యోగమూ హైదరాబాద్ లో. అప్పుడప్పుడూ రాసే కవిత్వంతో పాటు, సాహిత్యం, రాజకీయాలు, ఆర్థిక అంశాలు, టెక్నాలజీ ధోరణుల పైన విశ్లేషణ వ్యాసాలు, తెలుగు, ఇంగ్లీషు అనువాదాలు వివిధ పత్రికలలోనూ, పుస్తకాలలోనూ అచ్చయ్యాయి.