ఉండుమరి కాళికలా

మెదడు మోకాళ్ళలో ఉన్నప్పుడు
మోకాళ్ళ పైనున్న చర్మపు సంచీ మీద
నేరం మోపడం సహజమే కదా
మెదళ్ళు మారాల్సిన చోట
మొగతనం నూర్చాలనేదెవరైనా
మౌకావాదమంటాను నేను

సామన్యులు అసమాన్యంగా ఆశించలేక
కాస్ట్రేషన్ అడిగుంటారులే
కానీ..
ప్రజాప్రతినిధులు ప్రతిపక్ష నాయకులు
అతి సామాన్యంగా
సినిమాటిక్ కోరిక కోరితెట్లా
మూడు దశాబ్దాల నేరచరిత్ర
ఈరోజే కన్ను తెరిచింది
సకుటుంబ సమేత సజీవదహన సాక్ష్యంగా
నూరు గోదలతిన్న రాబందు కత పాతదే
ఇప్పుడిక్కడ కొత్త ‘పాడి’ఎట్లనో
అరాచక వెండితెరపై వేచిచూడాలి
చట్టం చేతుల కొలతలు తేలాలి
సస్పెండయితే పదోన్నతి తప్పని చర్య
అరెస్టయిన వెంటనే బైల్ అతి సహజం

విచారకర సత్యం ఏమిటంటే
వేటయ్యేందుకు ఎంపిక చేసింది సొంతరక్తమే
అమాయకపు ఆశలకు ఆసరాలనుకున్న కీచకం
చిన్న చేపను పెద్దచేప మింగుడే దినచర్య
ఇక్కడన్నీ తిమింగలాలుగా మారినంక
ప్రజలే బలిపశువులు ప్రజాస్వామ్యం నైవేద్యం
అమ్మలే.. అమ్మాయిలే.. జాగ్రత్తగా ఉండాలట

నిజమే..

ఉంటే అమాయకం లేకుంటే అరాచకం కాదు
తెలివిడిగా కలివిడిగా అవసరమైతే కాళికలా
ఉండుమరి.. నికార్సయిన ఓటరులా…

జ్వలిత

జననం: ఖమ్మం జిల్లా, గార్ల మండలం పెద్ద కిష్టాపురం. విశ్రాంత ప్రభుత్వ ఉపాధ్యాయిని. కవయిత్రి. రచనలు: కాలాన్ని జయిస్తూ నేను-2007(కవిత్వం), సుదీర్ఘ హత్య-2009(కవిత్వం), ఆత్మాన్వేషణ -2011(కథలు), అగ్ని లిపి-2012(తెలంగాణ ఉద్యమ కవిత్వం), జ్వలితార్ణవాలు- 2016(సాహిత్య సామాజిక వ్యాసాలు), సంపాదకత్వం: పరివ్యాప్త-2007(స్త్రీవాద కవిత్వం), రుంజ - 2013(విశ్వకర్మ కవుల కవిత్వం), ఖమ్మం కథలు - 2016(1911-2016వరకు 104 సంవత్సరాల, ఖమ్మం జిల్లా 104రచయితల 104కథలు), అక్షర పుష్పాలు-భావ సౌరభాలు - 2016 (ఖమ్మం బాల కవుల రచనల సంకలనం), ఓరు - 2017(జ్వలిత సాహిత్య సంక్షిప్త సమాలోచన). పనిచేసిన సాహితీ సంస్థలు: 'మట్టిపూలు', 'రుంజ', 'అఖిల భారత రచయిత్రుల సంఘం', 'దబరకం', 'తెలంగాణ విద్యావంతుల వేదిక'. ప్రస్తుతం సాహితీవనం మిద్దెతోట సాగు చేస్తున్నారు.