ఇప్పుడు మరో గాయం

మట్టి ముఖంపై
రెండు కళ్లు మొలిచాయి

అక్కడ
ఒక యుద్ధమే జరిగిందో ?
ఓ నాగరికత విలసిల్లి గతించిందో ?
ఒక ప్రేమ కుటీరం చరిత్రగతిలో మాయమైందో ?

ఆ గాయపడి
గట్టిపడ్డ భూమిపై ఇప్పుడు
రెండు కళ్లు మొలిచాయి

కళ్లను అక్కడ ఎవరు నాటుంటారు ?
ఆకాశమా ?
మేఘమా ?
లేదూ
రక్తమోడుతూ నడిచెళ్లిన పాదాలా ?

పళ్లతో ఇనుపకంచెని కొరికే భూమికి
ఆ రెండు కళ్లు ఆరో ప్రాణాలు

భూమిపై మొక్కలకన్నా
గ్రానైట్ స్తంభాలే పెరుగుతున్నప్పుడు
కన్నీళ్ల సంగతేంటి

ఇంతకీ
ఇనుప కంచెలు
రక్షణ కోసమా ?
రాజ్యం సరిహద్దులు చెప్పడం కోసమా ?
ఆంక్షల జీవనాన్ని తెలియజేయడం కోసమా ?
ఏమో ?

పసిప్రాయపు చేతుల్ని చుట్టుకుని
చీకటిని మింగిన భూమికి
తన దేహం బంధించబడ్డ
మరబొమ్మలాగే అనిపిస్తుంది

శ్వేత పత్రాల్లా
మబ్బు లేఖల్లా
ఆకాశ ప్రతినిధుల్లా కనబడే కళ్లు
మట్టిగోళ్ల నుండి పైకెగసె దుమ్ము పట్టిన అక్షరాలు
ప్రతి రోజు ఆ దారిన వెళ్లే మనిషిని అభ్యర్థిస్తుంటాయి
-” ఈమెని విడుదల చేయండి
ఈమెకి స్వేచ్ఛనియ్యండని “

భూమి తన కడుపున పంటని కని
ఎన్నేళ్ళయిందోనని వగస్తూ
కళ్ల నుంచి మళ్లీ కన్నీటినితోడి
బయటికి కుమ్మరిస్తుంది

ఈ సారి
పక్కాగా వెళ్లిన మనిషి
ఇంకో ఇనుప కంచెని
భుజంపై నించి కిందకు దించాడు.
భూమి గుండెపై ఇప్పుడు మరో గాయం…

మెర్సీ మార్గరెట్ బోడ

పుట్టింది, పెరిగింది హైదరాబాద్ లో .  స్వస్థలం అప్పటి నల్లగొండ జిల్లా సూర్యాపేట దగ్గర వల్లభాపురం. కవయిత్రి, కథా రచయిత. సామాజిక కార్యకర్త. పన్నెండేళ్లుగా కవిత్వం రాస్తున్నారు. రచనలు: 'మాటల మడుగు', 'కాలం వాలిపోతున్న వైపు'  (కవిత్వ సంపుటాలు).  అప్పుడప్పుడు కథలు రాస్తుంటారు. 'మాటల మడుగు' పుస్తకానికి కేంద్ర సాహిత్య అకాడమీ యువ పురస్కారం లభించింది. త్వరలో మరో కవిత్వ సంపుటి  రానుంది.