సూపులు కత్తులు జెయ్యాలే ఇగ బరిసెలు బాకులు ఎత్తాలే

ఎవరికి రక్షణ వున్నదీ
ఈ కీచక పాలనలో…
ఎవరికి ఆలన వున్నదీ
ఈ వంచక రాజ్యం లో…

మానాల్ దోయుడు
మామూల్ ఇక్కడ..
పానాల్ దీయుడు
ఓ ఫ్యాషన్ యీడా..

చుట్టాలయ్యి చట్టాలెల్ల
చెట్టా పట్టాలేసుకు తిర్గి
హంతకులంతా ఒకటైరే
ముఠాలుగట్టి గద్దెలెక్కిరే
||ఎవరికి||

కళ్ళక్కమ్మి కామంపొరలు
కుమ్ములాటలకు కాల్దువ్వి
మన్వోతుల మించినదొమ్మై
ఇజ్జత్నీడ బరిబాతల జేసిరి

ఆలికి అమ్మకు ఫరకే మరచి
బాలల బామ్మల సోయే ఇడ్సి
చిత్తకార్తి కుక్కలుగ చెలరేగిరే
సావు కాలమిగ దాపురించెనే
||ఎవరికి||

రైళ్లళ్ళై నా బస్సుల్లయినా
బడులల్లయిన గుడుల్లైనా
శిశువైనా డాక్టర్టీచర్లెవ రైనా
నోళ్లు తెరిచెనే బలి పీఠాల్

హెల్ప్ హెల్పంటూ కేకలొద్దిక
శరీరమంతా ఈటెలుఅయ్యీ
ఘడియఘడియ రెప్పవాల్చక
యుద్ధ భూమిగా తీర్చి దిద్దుకో
||ఎవరికి||

చెదరకు చెల్లీ కుంగకు తల్లీ
డేంజరు నెరిగి నిప్పై రేగి క
సూపులు కత్తులు జెయ్యాలే
ఇగ బరిసెల్ బాకులు ఎత్తాలే

విముక్తిదారుల్ ఎదురుగున్నవి
బెదురునిడిసి వెదురువనానివై
నిటారు గెదుగూ నింగే హద్దులే
ఖానూన్ భ్రమల ఖననం గాకూ
||ఎవరికి||

జనతనపోరై గుప్పున లేస్తెనే
పట్టిన జలగలు పరారు ఐతై
నక్కల గాసే దొంగల సర్కార్
మక్కెలు ఇరిగి నీలిగి సస్తది

ఇక్బాల్

పుట్టిన ఊరు కొల్లాపూర్ - వరిదేలవీధి(1960లో), ఇప్పటి నాగర్ కర్నూల్ జిల్లా. నేపథ్యం: దోయబడ్డ బాల్యం, కష్టాలు కన్నీళ్లు, ఆకలి అవమానాలే తోబుట్టువులు. చెమట సౌరభాల మడి అమ్మవడే బడిగా... తలాపున నల్లమల అడవే ఆట మైదానంగా... ఎలుగెత్తి పారే కృష్ణా నది చేతికందే దూరంలో ఉండీ గొంతు తడవని దాహంతో ఏళ్లకేళ్లు కురవని మేఘాలతో పరుగు తీసే మేకలతో, చెట్టు పుట్టలతోచెట్టా పట్టాలేసుకు సాగిన సాహచర్యం. వృత్తి: న్యాయవాదం. ప్రవృత్తి : సాహిత్య అధ్యయనం. 1978 నుండి కవిత్వం, పాట, వ్యాసం, కథా, చిత్ర, నాటిక రచన, నటన. రచనలు : 1. 'స్పందన'( కవితా సంకలనం) 1985 గద్వాల్ విరసం రాష్ట్ర సభల్లో ఆవిష్కరణ. 2. 'సేద్యం' (కవితా సంకలనం), 3. 'కఫన్' (కథా సంకలనం), 4. సాంగ్ ఆఫ్ ఫర్రోస్ (కవిత్వం) ( ఆంగ్లానువాదం: అర్విణి రాజేంద్రబాబు గారిచే), 5. 'రాహేc', 6. 'జాబిలి ఖైదు', 7. 'దగ్ధ స్వప్నం' (కవితా సంకలనాలు ప్రచురించారు.)