సమ్మక్క సారక్క జాతరా
స్వయంపాలన యాతరా
మేడారం కోయదొరల
వనరాజ్యం ఖ్యాతిరా || సమ్మక్క ||
అది చిలుకల గుట్ట అడివిరా – ఆడ
చిలుకలు సాము జేసురా
పులుసు వాగు పూనుగొండ్లరా – ఆడ
పడిగిద్దరాజు పుట్టెరా
సంపెంగ వాగు వంకరా – అది
జంపన్నగా పారుతుండెరా
ఏడు గొట్లయి రగిలి
గుట్ట తనువై మిగిలి
మేడారమే కొలువు
పోరాటపు నెలవు || సమ్మక్క ||
అది అడ్వితల్లి గుండె గూడెము – సూడు
ఆడమగలంత సైన్యమూ
పోడుగొట్టి చేసే ఎవుసమూ – ఆడ
వానపడ్తానే ఫలితమూ
కాయకష్టం మింగె కరువురా – కోయ
బతుకులాడ బరువురా.
కరువులో కప్పం గట్టాలంటూ
కాకతీయులే కాలు దువ్వితే
కన్నెపల్లెలో మాటేసి
కొండ కోనలతో చుట్టేసి || సమ్మక్క ||
మన అమ్మల రాజ్యమొకటుండెరా – అది
లోకమంతా విలసిల్లెరా
అది ఆత్మగౌరవాల బాసరా – అది
ఆకలి పేగుల కేకరా
బండారు వర్ణాల కొండరా నొసట
మంకెన పూల బొట్టురా
సిగలో ఎన్నెల బెట్టి
సిల్ల చేతుల బట్టి
పరుల పాలనపైన
పౌరుషము నెగజల్లి || సమ్మక్క ||
ఆడ ఉసికేబోస్తె రాలదెందుకు – నీతి
మనుషులా త్యాగమైనందుకు
అడివిమాదనే ప్రకటనెందుకు – ఆది
వాసుల సొత్తయినందుకు
శ్రమజీవులా పోరాటమెందుకు విశ్వ
మంతా శ్రమదైనందుకు
మూలవాసుల మీద
జులుము చెల్లదంటు
కొమురం భీములా
రామ్ గోండులా || సమ్మక్క ||
ఇది పోరాట చరితల జాడరా – ఈడ
ప్రతిన దప్ప ప్రతిమలొద్దురా
నిండు ప్రాణాలు బాణంగా దూసిరా – జువ్వి
చెట్టుకు త్యాగాలు దాసిరా
గుండె గుండెల్లోన గుడులురా – గుడి
బ్రాహ్మణ పూజారులొద్దురా
గట్టుదాటి వలస
ముట్టడించొస్తుంది
అడివి బిడ్డల్లార పయిలమూ
అందుకోండ్రమరుల బాణము
సమ్మక్క సారక్క జాతరా
స్వయం పాలన యాతరా
కోడి బెల్లాలెదురేసి
కొండోల్లు కోయోల్లు పిల్సిరా
కొండోల్లు కోయోల్లు పిల్సిరా
(సమ్మక్క సారలమ్మ నుండి – బిర్సాముండా, కోమురంభీం – రాంజీ గోండు ఆదివాసుల వనరాజ్యం కోసం దీక్షతో పోరాడిన ఆదివాసీ అమరులకు జోహార్లర్పిస్తూ…)
