కన్నీటితో కలలను కడగాలనుకుంటా-
మసకబారిన వర్తమానం వెక్కిరిస్తుంది.
గొంతెండిన వాళ్లు పాపం-
గోమూత్రానికి బదులు గుక్కెడు నీళ్లడుగుతారు.
నెత్తురు బదులు ఒంట్లో బత్తాయిరసం పారే వాళ్లకు
రోషం పొడుచుకొచ్చి కాళ్లతో తంతారు.
ఎండిన గొంతులెన్నటికీ ఊరుకోవు.
అరిచరిచి ఒకటే గీపెడతాయి.
నోట్లోంచి కారిన నెత్తుటిని
రాజ్యం ముఖాన ఉమ్మేస్తాయి.
కలలు స్వచ్ఛందంగానే
కన్నీటిలో స్నానమాడుతాయి.
మిరుమిట్లు గొలిపే భవితవ్యం
బత్తాయిల్లోని రసాన్నిసమూలంగా పీల్చేస్తుంది.
ఇదంతా ఒక పగటి కల-
మధ్యాహ్నమే బత్తాయిరసం తాగి
బడలికతో నిద్రపోయాను.
Excellent