త్యాగాల నెత్తుటి ముద్ద గణేష్ 

పల్లవి:
త్యాగాల నెత్తుటి ముద్దయి
తరలీ వస్తుండో గణేష్ – తరలీ వస్తుండో
బానిసత్వమును తరిమే పోరును
తోడుగా తెస్తుండో గణేష్ – తోడుగా తెస్తుండో
తిరుగుబాటునే తెస్తుండో
వెలిశాలకే వస్తుండో ||త్యాగాల||

1. దిద్దాలమ్మ ఇంటికొక్కరు
వీర తిలకమే దిద్దాలో – ||వీ||
ఇయ్యాలమ్మ ఎన్నెల కాంతులు
హారతిగానే ఇయ్యాలో – ||హా||
ఊరంతా తల్లిదండ్రులై
సల్లని దీవెనలియ్యాలో- ||సll
యువతీ యువకులు పిడికిల్లెత్తి
వీరంగమే ఆడాలో – ||వీ||
కగార్ దాడులు ఆపేదాకా
కలిసి పోరు జెయ్యాలో ||త్యాగాల||

2. ఉదయించేది రవికిరణమే
విప్లవ స్వాగతమివ్వాలో ||వి||
ప్రజల కొరకే ప్రాణమిస్తామని
ఊరుకొక్కరు పుట్టాలో
సావులేని నీ ఆశయాలకు
నిత్య యవ్వనం ఉండాలో
మీ ఇంట్లో ఇద్దరూ లోకాన
ఎందరు అమరులయ్యిరని చాటాలో
ఆ కాకమ్మ నీకెదురుగ వచ్చీ
కావు కావుమని పిలవాలో ||త్యాగాల||

3. నిను సాదిన దండాకారణ్యం
గండాలెదురుకుంటుందో
నువు దాటిన నదులు సుడులై తిరిగి
నెత్తురు టేరులు పారాయో
మిము దల్సుకోని పక్షులన్నీ
వెక్కివెక్కి ఏడ్సినాయో
ఆ గోతికాడి గుంటనక్కలు
ఉల వెడుతూ వస్తుంటే
ఆ రేలా పూలు రాలిపడుతూ
మెడలో దండాలైనాయో

ఎర్ర పూల దండాలైనాయో
గోగుపుల దండాలైనాయో

(మావోయిస్టు పార్టీ కేంద్ర కమిటీ సభ్యుడు, 2004 శాంతి చర్చల ప్రతినిధి కామ్రేడ్ గణేష్ స్మృతిలో.. ఆయన పార్థివ దేహం వెలిశాలకు వస్తున్న సందర్భంగా..)

మిత్ర

పుట్టింది కరీంనగర్ జిల్లా వేములవాడ. కవి, రచయిత, గాయకుడు. విప్లవోద్యమ నాయకుడు. అసలు పేరు కూర దేవేందర్. కలం పేరు మిత్ర. అమర్ పేరుతో సీపీఐ(ఎం.ఎల్.) జనశక్తి రాష్ట్ర కార్యదర్శిగా పనిచేశాడు. రచనలు : 1. మిత్ర తెలంగాణ పాటలు, 2. పొదుగు, 3. వరుపు, 4. మిత్ర జనం పాటల సవ్వడి (పాటలు); 5. చితాభస్మంలోంచి...(కవిత్వం); 6. తెలంగాణ డప్పు దరువు, 7. తెలంగాణ ధూం ధాం, 8. తెలంగాణ కోలాటం పాట, 9. ముంబై తెలంగాణం, 10. బహుజన బతుకమ్మ, 11. వీరతెలంగాణ (నృత్యరూప గానాలు).