చేతులు

వ్యవసాయం చేసి
పశుపక్ష్యాదులకు తిండి పెట్టిన చేతులవి

ఎండిన తమ పేగులను విరిచి
దేశానికి తిండి పెట్టిన గుండెలవి

అవి
ఈ భూమండలంపై కదిలే చెట్లు
వర్షించే మేఘాలు
వెన్నెల పారే నదులు
సూర్యకిరణాలను ప్రసరిస్తూ
ఎవుసం చేసే నాగళ్ళు

ఆదివాసీ చేతులు
విల్లు బాణాల చరిత్ర పుస్తకాలు
కాగడాలతో వర్తమానాన్ని రచిస్తున్న కలాలు
భవిష్యత్తును పాడుతున్న కొండనాలుకలు

ఆదివాసీ చేతులు
సాయుధులైన కొండకోనల రక్త మాంసాలు.

దొంతం చరణ్

పుట్టిన ఊరు వింజమూరు, నల్లగొండ జిల్లా. కవి, సామాజిక కార్యకర్త. ఎనిమిదో తరగతి నుంచే కవిత్వం రాస్తున్నాడు. ఆచార్య ఖండవల్లి లక్ష్మీరంజనం ప్రాచ్య కళాశాల(నల్లకుంట, హైదరాబాద్)లో డిగ్రీ, పొట్టి శ్రీరాములు తెలుగు విశ్వవిద్యాలయంలో ఎం.ఎ తెలుగు లిట్ పూర్తి చేసాడు. ప్రస్తుతం జర్నలిస్టుగా పనిచేస్తున్నాడు. ప్రవృత్తి ఫోటోగ్రఫీ.