పాలపొడి ద్వారానో, టీకాల ద్వారానో
పిల్లలను, పెద్దలను విషపూరితం చేసిన వారు-
యువత అద్భుత నైపుణ్యాన్ని
పట్టపగలు వీధి దీపాలు చేసిన వారు-
పాత్రికేయుల ముఖాలకు చీకటిని పులిమినవారు-
మైకులను ఉరిదీసి పాటగాళ్లను
కచేరికి ఆహ్వానించిన వారు-
దర్శకులకు అవకాశమిచ్చి
సెన్సార్‌ తోక కత్తిరించిన వారు-
నల్లగౌను వెనుక ధైర్యాన్ని
బోను ఎక్కించినవారు-
వకీళ్ల మెడకి పీనల్ కోడ్‌ని బిగించినవారు-
మంత్రశక్తితో వైద్యశాస్త్రాన్ని వశీకరణ చేసుకున్నవారు-
కాస్మిక్ ఎనర్జీకి పిండిబొమ్మతో చేతబడిచేసినవారు-
హద్దుల్లేని సైనికుల పరాక్రమాన్ని అపహాస్యం చేసినవారు-
ఆవేదనతో పెగిలిన గుండెలపైకి
బుల్డోజర్ నడిపిన వారు-
వందలాది అత్యాచారాల తర్వాత
మాంగళ్యధారణతో పవిత్రతను ఆపాదించేవారు-
సైన్స్ ను గారడీ విద్య చేసి
స్వయంభువులుగా ప్రకటించుకున్నవారు-
వారు, వారేనా, ఎప్పటికీ?
