ఆస్కార్ అవార్డ్ గురించి రాయడానికైనా ఆస్కారముందా?

ఒకరి బాధ మన బాధ కాకపోవడం
చాలా బాధాకరమైన విషయం
ఒకరి సమస్య మనకొక సమస్య కాకపోవడం
చాలా సమస్యాత్మకమైన సమస్య
మనిషి గురించి మనిషి కాకుండా ఎవరు పట్టించుకోవాలి –
నేనేమీ ఇప్పుడు కాల్పుల విరమణ
ఆగిపోయిన గాజాలో మళ్ళీ ఇజ్రాయిల్
మారణకాండ గురించి రాయడం లేదు
మనం క్రికెట్ అంత ఆసక్తిగా
ఏభైవేలు మృతులు – ఇజ్రాయిల్ నాట్ అవుట్ –
స్కోర్ పెరగడానికి అలవాటు పడ్డాం
అందులో సగం పసిపిల్లలే అని
మీ మానవత్వాన్ని ఎక్కడో సున్నితంగా
స్పృశించడానికి ప్రయత్నించడం లేదు
మరి ఎక్కడో ఒకచోట ఉండి,
ఉండడానికి ఇల్లు ఉండి,
చదవడానికి సౌకర్యం ఉండి
ఇది చదువుతున్నారు గదా –
అతడు ‘నో అదర్ ల్యాండ్’ అంటున్నాడు –
ఏ నేల మీదా ఇంత మనుషుల రక్తం పారలేదని –
మాకే నేలా మిగలలేదని –
ఇది ఆక్రమణ యుద్ధం కొనసాగుతున్న
గాజా గాధ కూడ కాదు –
కానీ ఇది సెటిలర్స్ ఆక్రమించుకున్న
ఇజ్రాయిల్ సైన్యం వాళ్ళకండగా ఉన్న
పాలస్తీనా వెస్ట్ బ్యాంక్‌లో జరిగింది
తెలుగు శబ్ద సౌందర్యమే మీరిష్టపడితే
ఆక్రమిత పశ్చిమ తీరాన జరిగింది –
అక్కడ ఆయనకొక ఇల్లు ఉంది –
“ఆ ఇంట్లో ఇపుడు నేను
బల్లాల్ హమ్దాన్ ఏడేళ్ళ కొడుకు పక్కన
నిలబడి మాట్లాడుతున్నాను
అతని ఇంట్లోనే హమ్దాన్ నెత్తురుతో
అలికిన ఇంట్లో.”
లించింగ్ అనే మాట ఇప్పుడు
మనకు కూడ తెలుగుమాటయింది కదా
బుల్డోజర్ వలెనే – ఏరియల్ బాంబు వలెనే
ఎన్‌కౌంటర్ల వలెనే –
‘ఇక్కడి సెటిలర్స్ అతణ్ణి
చితక్కొట్టి ఎత్తుకుపోయారు –
ఇపుడు అక్కడ ఇంకా అతని తడిఆరని రక్తం –
అతని కొడుకు కళ్ళల్లో ఉబికి వచ్చే రక్తాశ్రువులు –
చెప్తున్నవాడు యువాల్ అబ్రహం –
అనుమానమొద్దు – అతడు పాలస్తీనియన్ కాదు ఇజ్రాయిలీ
హమ్దాన్‌తో కలిసి నో అదర్ ల్యాండ్ డాక్యుమెంటరీ తీసినవాడు –
ఇపుడు వింటారా – అతడు కళాకారుడు
ఆ డాక్యుమెంటరీ కోసం
ఆస్కార్ అవార్డ్ తీసుకోవడం కోసం
ఆయనకు పొరుగుదేశంలో స్థలం ఉంది
కానీ, ఆయన తిరిగిరావడానికి
ఆయన ఊరు సుసియాలో ఆయనకు
తలదాచుకోడానికి చోటు లేదు –
ముందే చెప్పాను కదా
నేనేమీ మామూలు మనుషుల గురించి చెప్పడం లేదని –
పసిపిల్లల గురించి, గాజా గురించి కూడ చెప్పడం లేదు.
తరువాత అబ్రహం చెప్పినట్లు
ఇదిగో ఇట్లా మసాఫర్ హట్టాను
వాళ్ళు తుడిచిపెట్టారు –
నో అదర్ ల్యాండ్ – అని చెప్తున్నాము –
నేనేమీ నేల కోల్పోతున్న వాళ్ళ గురించి
మిమ్మల్ని ఆలోచించమనడం లేదు
తప్పకుండా మనం ఆస్కార్ అవార్డు గురించి చెప్తే వినే ఆస్కారం ఉంది గదా
అదుగో అతడు – ఇపుడు కిడ్నాపు అయి
గాయాలతో ఇజ్రాయిల్ మిలటరీ క్యాంపులో ఉన్నాడంటున్నారు –
ఎంత నిజమో –
అల్‌జజీరా వీడియో తప్ప, అర్నాబ్ గోస్వామి చెప్పడు
మనకీ విషయం బిబిసి చెప్పదు –
“దేశభక్తి” మీడియా ఎవరూ చెప్పరు
మీరు వినే ఉంటారు – ట్రంప్ వంటి అమెరికన్లు
నెతన్యాహు‌ వంటి ఇజ్రాయిలీలు
ఇద్దరూ సెటిలర్లే – ఆయా దేశాల్లో
కూడ పొంచిన టెర్రరిస్టులు –
లేదా అమెరికాలో మెకార్థే కాలం నుంచీ
పెంచి పోషిస్తున్న సాయుధ ముఠా సెటిలర్స్ వాళ్ళు,
కెకెకె(కు క్లక్స్ క్లాన్) ను మించినవాళ్లు
వాళ్ళు ఎత్తుకపోయారని చెప్తుంది
డాష్ కాం వీడియో –
సెంటర్ ఫర్ జూయిష్ నాన్ వాయిలెన్స్
అహింసను కోరుతున్న యూదుల కేంద్రం
నిర్వహిస్తున్న వీడియో
మనుషుల కోసం మనుషుల ఆరాటం ఉంది
కాదనను – కానీ అది చాలదు –
ఒక పాలస్తీనియన్ ఒక ఇజ్రాయిలీ
కలిసి డాక్యుమెంటరీ చేశారు –
అదే విశేషం – దాన్ని ఆస్కార్ అవార్డ్ గుర్తించింది –
కానీ గ్రౌండ్ మీది రియాలిటీ అంటారే –
నేల మీద ఆకాశం నుంచి జరుగుతున్న ఆక్రమణ యుద్ధం
ఇంట్లోకి చొచ్చుకొని వచ్చి ఇది నా ఇల్లే అంటున్నవానితో యుధ్ధం –
బల్లాల్ హమ్దాజ్ ఇల్లు చొచ్చుకుపోయిన యుద్ధం –
అది నిన్ను నా కోసం ‘నో అదర్ ల్యాండ్’ అనొద్దంటున్నది –
స్వేచ్ఛకెక్కడా చోటు లేదు అనొద్దంటున్నది
మీకిప్పటికీ అవార్డుల కోసం రాసే స్వేచ్ఛ ఉంది కదూ –
దేని గురించి రాస్తారు మరి –
నేల ఆక్రమించబడుతున్న వీళ్ళ కోసమా
అట్లన్నందుకు అపహరించబడిన వాళ్ళకోసమా
ఆలోచించండి –
మన పక్కన ఉన్న బస్తర్ గురించో, ఆదివాసుల నిర్మూలనకు గడువు పెట్టిన కగార్ గురించో కాకపోయినా
గాజా, పాలస్తీనియన్ల గురించి కాకపోయినా
బలాల్ హమ్దాజ్ గురించీ
నో అదర్ ల్యాండ్ గురించి కాకపోయినా
ఆస్కార్ అవార్డు గురించయినా రాయడానికేమయినా ఆస్కారముందేమో?

ఫెలో ట్రావెలర్