అన్న దేవన్న కళ్ళ జూడన్న
పల్లెలే ఘోల్లుమన్నాయి – ఈ
అడవులే సిన్నబోయినాయి
అన్న భరతన్న తిర్గి సూడన్న
దునియెట్ల మారుతున్నాది – ఆ
యుద్ధాల్లో మున్గుతున్నది
అన్నా దేవన్న-అన్నన్న భరతన్న
నీతోటి ముగ్గురికి ఇరవై ఐదేళ్ళు
||ఇరవై ఐదేళ్ళు||
మీ రక్తాలు ఈ నేల త్యాగాల జల్లు
కళ్ళ జూసెనయ్య మన ఓరుగల్లు
||మన ఓరుగల్లు||
ఊరుకొక్కటన్న అమరుల ఇల్లు
||అన్నా||
1)
కొక్కొర కోయంటు కోడిగూయంగా
తెల్లారెనమ్మా ఎంచగూడెంలో
||తెల్లారెనమ్మా||
భగభగ సూర్యుడు మండుతుండంగా
బండి కొమురవ్వ కడుపు పండిందో
||బండి కొమురవ్వ||
గొల్లోల్ల అల్లోరు ముల్లుగట్టిడిసి
జంగుసైరానూదే జనములో గల్సీ
జబ్బకు బందూకు బైలెల్లెనమ్మా
కొండకోనల దళము గట్టినాడమ్మ
దండమో దండాలు-అన్నా భరతన్న
నీతోటి వీరులకు-శణార్థులన్నా
2)
సుక్కల పర్వతమెక్కి సూడంగా
శంకరన్న ఎర్ర సుక్కల్ల ఉండే ||శంకరన్న||
దిక్కులన్ని గూడి ముచ్చటాడంగా
రంగవల్లి పోరు పాఠమైతుండే. ||రంగవల్లి||
రామనరసయ్య ఉదయిస్తూ ఉండే
సిలుకల గుట్టడివి సిందేస్తుండే
నీతోటి ఇద్దరు నేలరాలిండ్రే
నీ ఎన్క చంద్రం రామన్నలుండ్రే
దండమో దండాలు-అన్నా భరతన్నా
నీతోటి వీరులకు-శణార్థులన్నా
||అన్నా||
3)
పోడుభూమి పోలికేక వెట్టంగా
ఆదివాసులు పంచ ప్రాణాలయిరి
||ఆదివాసులు||
మేడారం జన జాతర రాంగా
రైతాంగమంతా రణరంగమైరీ
||రైతాంగమంతా||
బైలెల్లి పోతిరీ గోదారిలాగా
పచ్చని పంటకు నీళ్ళయినట్టు
నిలిసిరి గుడిసెకు నిట్టాడులాగా
మన ఊళ్ళో మన రాజ్యమైనట్లు
దండమో దండాలు-అన్నా భరతన్నా
నీతోటి వీరులకు-శణార్థులన్నా
||అన్నా||
4)
సూడుండ్రి పల్లెల్ని కళ్ళ నిండుంగా
మత్తులోన మునిగి ఊగుతున్నాయో
తిరగబడే యువత తాగి ఊగంగా
పోరాట దారెట్ల సిన్న బోయిందో
పదిమంది కోసం ప్రాణాలనిచ్చే
త్యాగాల తరము మళ్ళెప్పుడొచ్చూ
ఎదిరి చూస్తున్నాయి స్థూపాలు మీరై
సరసన పల్లి సమరనాదాలై
దండమో దండాలు-అన్నా భరతన్నా
దండాలు నీకు కృష్ణారెడ్డన్న
దండమో రాజు-పోరు దండాలు
అందరికీ ఎర్రెర్ర దండాలు
(జులై 19, 2025న సరసన పల్లి అమరులు కామ్రేడ్స్ భరత్, కృష్ణారెడ్డి, రాజు ల 25వ వర్ధంతి ఎంచగూడెం,పల్లెపాడు లలో జరుగుతున్న సందర్భంగా….)
