అతని మీద అతని ప్రేమ?

Hearts are like wild birds

They go where they are loved – Imam Ali

సతీష్ గోడ మీద చాలా ఇష్టంగా పెట్టుకున్న పోస్టర్ అది. విశ్వైక కళ్ళార్పకుండా ఆ వాక్యాలని ఒకటికి రెండుసార్లు చదివింది. కొత్తగా అర్థం అవుతున్నట్లు అనిపించింది.

“నాన్నా చాలా చెప్పాలని ఉంది కానీ ఎలా చెప్పాలో అర్థం కావట్లేదు. నిన్నోసారి కలవాలి. మనం ఎదురుబొదురుగా కూర్చుని చాలా మాట్లాడుకోవాలి. నువ్వు నన్ను తిడతావేమో? ఫరవాలేదు భరిస్తాను నాన్నా” విశ్వైక గొంతు వణుకుతోంది. కళ్లల్లోంచి ధారగా కారే కన్నీటిని తుడుచుకుంటూనే నాన్నతో మాట్లాడుతోంది.

విశ్వైక తండ్రి ప్రసాద్ గుండె గుభిల్లుమంది. ”ఏమైంది విశ్వా అంతా మంచిదే కదా, ఎందుకు బిడ్డా అట్ల ఏడుస్తున్నావు? సతీష్ క్షేమమే కదా”? ప్రసాద్ ఖంగారుగా అడిగాడు. అవతల నుంచి విశ్వైక దు:ఖం అణుచుకుంటున్నగొంతు నిశ్శబ్దమైపోతున్నది. పక్కనే ఉన్న వర్ధని భర్త ప్రసాద్‌ను ”ఏమైంది విశ్వకు చెప్పండి” అంటూ కుదిపేస్తున్నది.

విశ్వైక దు:ఖంతో ఫోన్ పెట్టేసింది, నాన్నతో మాటలు పూర్తి చేయలేక. బెడ్ రూమ్ లో నిద్రపట్టక అలజడిగా బాల్కనీలో మాట్లాడుతున్న విశ్వైక మాటలు వింటున్నాడు సతీష్. దు:ఖంతో ముడుచుకుపోయాడు. ఊపిరాడక మెల్లిగా లేచి హాల్లోకి వచ్చాడు. బెడ్ రూమ్ అవతల ఉన్నబాల్కనీలోని నిశ్శబ్దంలో భార్య విశ్వైక వేదన వినిపిస్తోంది. మెల్లిగా చెప్పులేసుకుని ఇంటి బయటికొచ్చి రోడ్డు మీద నడవ సాగాడు. ఆకాశం నేల మీద వెన్నెల కుమ్మరిస్తోంది. సతీష్ హృదయం మాత్రం వేడెక్కిపోతోంది. వేసవి రాత్రి ఆ శీతల గాలులు అతని మనసుని మరింత వేడెక్కిస్తున్నాయి. అల్లకల్లోలంగా ఉన్న హృదయాన్ని కుదుటపరచడానికన్నట్టుగా అతను సిగరెట్ వెలిగించాడు. ఊపిరితిత్తుల్లో వెచ్చగా నిండుకుంటున్న పొగ అతన్ని కొంత శాంతపరిచింది. ఇంతలో ఫోన్లో మెసెజ్ రింగ్ మ్రోగింది శౌర్య నుంచి. అంత వేదనలోనూ సతీష్ పెదవులపై చిన్న నవ్వు విచ్చుకుంది. మళ్లీ పక్కనే విశ్వైక ఏడుపు శబ్దం వినపడ్డట్టై చిన్నబోయాడు. మెల్లిగా నడుస్తూనే మెసేజ్ ఓపెన్ చేసాడు.

“సముద్రం చల్లగాలిని కోరుకున్నట్లు నేను నీకోసం తపించిపోతాను.

అడవి చెట్ల కోసం అలమటించినట్లు నేను నీ కోసం ఎదురుచూస్తాను.

మనం దగ్గరగా కాకుండా విడిగా ఉన్నప్పుడు,                                                                                                                              

నా  ఎముకలు బాధతో మూలుగుతాయి.                                                                                                    

కేవలం ఒక్క నువ్వే వాటిని కలిపి ఉంచే అత్యవసరమైనవాడివైనట్లుగా ఎదురు చూస్తాయి-{మూలం} కెర్లీ రోస్ నార్త్. ప్రియ సతీష్ లవ్ యూ -శౌర్య. కెర్లీ రోస్ మన గురించే రాసినట్లు లేదూ? మొన్నటి నా ఎముకలు విరిచినట్లున్న నీ దృఢమైన కౌగిలి గ్నాపకం వస్తున్నది. నన్ను ముద్దు పెట్టుకునే వేడెక్కిన నీ పెదవుల స్పర్శ, మల్లె, సంపెంగలను మరిపించే నీ ఊపిరి శ్వాస ఇంకా నా దేహాన్ని వదలనే లేదు. అప్పుడే ఎక్కడికి మాయమైపోయావు? నా కౌగిలిలో కదా ఉండాల్సింది నువ్వు? మనం ఇలా విడిగా కాకుండా ఎప్పటికీ కలిసి ఉంటే ఎంత బాగుంటుంది, బాగుండేది? కానీ కాలం, కాదు, కాదు నువ్వే పిరికివాడిలాగా లోకం, కుటుంబం అంటూ నన్ను దూరం చేసావు. ఎలా సతీష్ ఎంత కాలం ఇలా? నేనింకా చూడు అక్కడే ఉన్నా నువ్వొదిలిన చోట. సతీష్ బాగా, నిజంగా చాలా  గుర్తొస్తున్నావు. అసలు నువ్వూ, నేనూ ఇలా కలవలేని దిక్కుల్లా ఉండడం ఏమిటి? ఎందుకు? ఏమైనా అర్థం అవుతుందా నీకు? ”శౌర్య హృదయ ఘోష ముక్కలు ముక్కలుగా తెగిన వీణ పాటలా వినిపిస్తున్నది.

శౌర్య చాలా సున్నిత మనస్కుడు.సృజనాత్మకత వెల్లి విరిసే కవి,ప్రేమికుడు.కాలేజీలో పరిచయం అయిన తామిద్దరూ ప్రేమలో పడిన క్షణం నుంచీ, పుంఖానుపుంఖాలుగా కవిత్వం రాస్తూనే ఉన్నాడు. తామిద్దరి రహస్య ప్రేమ చాలా కాలంగా కొనసాగుతూ వచ్చింది. స్పోర్ట్స్ క్లబ్‌లో మొదలైన స్నేహం శౌర్య లవ్ ప్రపోజల్‌తో మరింత ధృడంగా మారింది. ఇద్దరూ మెడ లోతు ప్రేమలో మునిగి పోయాం. ఇంట్లో అమ్మానాన్నలకి, చెల్లి రజనికి ఈ విషయం తెలుసు. పదో తరగతి నుంచి తనకు పురుషుల పట్ల ఉన్న ఆకర్షణని ఇంట్లో కట్టడి చేస్తూనే ఉన్నారు.ఆడ పిల్లల పట్ల ఏ రకమైన ఆకర్షణా, ఇష్టం కలిగేది కాదు. ఇంటర్మీడియట్‌లో కౌన్సెలింగ్‌లు, సైకో థెరపీలు, సైకియాట్రి మెడిసిన్స్ కూడా ఇప్పించారు. అయినా పురుషుల పట్ల ఆకర్షణ,మోహం, ప్రేమ తగ్గలేదు ఇంకా ఎక్కువైంది. “నేను ‘గే’ని నాన్నా అర్థం చేసుకో. మీరెంత ట్రీట్‌‌మెంట్ ఇప్పించినా నాకు ఇది తగ్గదు. ఇదే నాకు సహజం” అని ఎన్నిసార్లు కొట్టడానికి వచ్చిన నాన్న ఒళ్లో తల పెట్టుకుని ఏడ్చాడో లెక్కే లేదు. ఆఖరికి ఒక కౌన్సెలర్ అమ్మానాన్నలకి, “అతనికి ఉన్నఈ మేల్ సెక్షువల్ అట్రాక్షన్ తగ్గించడానికి ఒత్తిడి పెట్టకండి. అతని మానసిక స్థితి ప్రమాదకరంగా మారిపోతుంది”అని హెచ్చరించాడు. ”అతనిష్టమొచ్చినట్టు ఉండనివ్వండి. కాలం గడిచే కొద్దీ మెల్లిగా తగ్గుతుందేమో చూడండి”అన్నాడు. అప్పటికే అమ్మా నాన్న కూడా డిప్రెషన్‌లోకి వెళ్లిపోయారు. మెల్లిగా లా కోర్సు పూర్తి చేసాడు. అప్పుడే శౌర్యతో ప్రేమలో పడ్డాడు. తనకు శౌర్యేమీ మొదటివాడు కాదు. తన మీద ఆకర్షణ కలిగిన పురుషులు తనని వాడుకున్నారు. తను సహకరించాడు. తనకీ ఇష్టం కాబట్టి. కానీ అవన్నీ థ్రిల్లింగ్ అనుభవం కోసం వెళ్లిన ‘ఒన్ నైట్ స్టాండ్’ లాంటివి. ఒట్టి ఆకర్షణ మాత్రమే. తనను తాను పరీక్షించుకుని ‘గే’గా ఖచ్చితంగా నిర్ధారించుకోవడం కోసం వెళ్లడం తప్పితే ఏ పురుషుడి తోనూ గాఢమైన ప్రేమలో పడలేదు. పురుషుని పట్ల తనకున్న శారీరక ఆకర్షణ వల్ల భయం, ఆందోళన, పశ్చాత్తాప భావనలోనే , మనుషుల్ని, బంధువుల్ని తప్పించుకుని తిరగడంతోనే సరిపోయింది. ‘లా’కాలేజీలోకి చేరాక మెల్లగా ‘ఎల్ జీబీటీ క్యూ’ కమ్యూనిటీలతో పరిచయంతో తన ప్రత్యేకమైన సమస్య పట్ల, ఒక శాస్త్రీయమైన స్పష్టత వచ్చి అక్కడ తనలాంటి ఎంతో మందిని కలిసాక వారితో కలిగిన సహ అనుభూతి తనలో ఆత్మవిశ్వాసాన్ని పెంచింది. అదిగో అక్కడ పరిచయం అయ్యాడు శౌర్య. ప్రేమన్నాడు, ప్రేమ లేఖలు రాసాడు, వేచి ఉన్నాడు. తనను  సాధించుకున్నాడు.ఇద్దరూ కలిసి బతకాలని, పెళ్లి చేస్కోవాలని అనుకున్నారు. ఇతర పురుషులతో  సెక్స్ సంబంధాలు లేకుండా ఇద్దరూ కలిసి ఉండాలని నిర్ణయించుకున్నారు. అన్ని రకాల STD పరీక్షలు చేయించుకున్నారు. అన్నీ నెగటివ్ వచ్చాక సంతోష పడ్డారు. తాను తన ఇంట్లో, శౌర్య తన ఇంట్లో చెప్పారు. రెండు ఇళ్ళల్లో ఆటం బాంబులు పేలినంత పనైపోయింది. అందరికీ తెలుస్తుంది ఒద్దన్నారు.పెద్ద పెద్ద గొడవలైపోయాయి.అమ్మ విల విల ఏడ్చింది.చచ్చిపోతానంది.ఇక ఇది భరించ లేక ఇద్దరూ రహస్యంగా కలవసాగారు.

ఇంతలో అనుకోని అతిథిలా విశ్వైక తన జీవితంలోకి వచ్చింది.ఆమె తన కొలిగ్. ఆమె తనతో ప్రేమలో పడింది. ప్రపోజల్ పెట్టింది. తనకి ఆమెతో స్నేహం తప్ప ప్రేమ లేదు. మూడేళ్ల స్నేహంలో ఆమె తనతో గాఢమైన ప్రేమలో పడిపోయింది. తన స్తబ్దత ఎందుకో ఆమెకి అర్థం కాలేదు. తనకి వేరే గర్ల్ ఫ్రెండ్స్‌ లేకపోవడం ఆమెకి నచ్చింది.శౌర్య ఆమెకు ఉన్న నిజం చెప్పెయ్యమని,తాను“గే“అని చెప్పెయ్యమని అన్నాడు. తాను  కూడా ఆమెకు చెప్పాలని ప్రయత్నిస్తూనే ఉన్నాడు.ఆమె ప్రేమకి ‘నో’ కూడా చెప్పాడు.”ఎవర్నైనా ప్రేమిస్తున్నావా నన్ను కాకుండా” అంది విశ్వైక బాధతో.”లేదు అలా ఏమి లేదు.ఎవర్ని ప్రేమించట్లేదు” అన్నాడు”మరి నేనంటే ఇష్టం లేదా”?అనేది.’’నేను నీకు తగ్గవాడిని కాదు,నీకు న్యాయం చేయలేను”అనేవాడు.”అబ్బా చాలు సతీష్ ఇక సతాయించకు ,నువ్వు లేకుండా బతకలేను,చచ్చిపోతాను”అనేది. ఎన్నోసార్లు ఇంటికొచ్చిన విశ్వైకకి తనంటే ఇష్టమని, ప్రేమని, పెళ్లి చేస్కోవాలని అనుకుంటోందని ఇంట్లో అమ్మానాన్నకి చెల్లికి తెలిసిపోయి చాలా సంతోషించారు. తనని బతిమిలలాడ్డం మొదలుపెట్టారు. “వొరే సతీషూ మా కోసం,బంధువుల కోసం, సమాజం కోసం చేస్కోరా, పిల్లలు పుడితే నీకూ ఒక కుటుంబం ఏర్పడుతుంది. మా పరువూ నిలబడుతుంది” అని ఎన్నిసార్లు చెప్పినా తను ఒప్పుకోలేదు. విశ్వైక జీవితం నాశనం చేయనని చెప్పాడు. అసలు ఆమెకే తానొక “గే”నని చెప్పాలని చాలాసార్లు ట్రై చేశాడు. గొంతుదాకా వచ్చిన మాట వెనక్కి వెళ్లిపోయేది. చివరాఖరికి ఒకటి రెండు సార్లు “విశ్వా నేను “గే”ని తెలుసా,నిజం?”అన్నాడు. విశ్వైక పగలబడి నవ్వేది ఎన్ని సార్లు చెబితే  అన్ని సార్లు.”నన్ను తప్పించుకోవడానికి ఈ ఎత్తు వేస్తున్నావు కదా”అని ఒకసారి నవ్వేది, ఇంకో సారి ఏడ్చేది.”నన్ను విడిచి పెట్టకు సతీష్” అంటూ. సరిగ్గా అప్పుడే శౌర్య ఆర్నెల్ల ట్రైనింగ్‌కి విదేశాలకి వెళ్లా‌డు. వెళ్ళే ముందు “సతీష్,విశ్వైక తో స్పష్టంగా చెప్పేయ్.ఆమెని మబ్బులో ఉంచకు.నువ్వు లేకుండా నాకు లైఫ్ లేదు తెలుసు కదా”అని చెప్పి మరీ వెళ్ళిపోయాడు. విశ్వైకకి తనంటే ఇష్టమని శౌర్యకి తెలుసు,కానీ ఇంత గాఢమైన ప్రేమలో ఉందని తను చెప్పలేదు. “నాకు దూరం కాకు, నీకు ఆమె మీద ఫీలింగ్స్ వస్తున్నాయా,నిజం చెప్పు”? అని శౌర్య అభద్రతతో, భయంతో అడిగేవాడు. “డోంట్ లీవ్ మీ సతీష్” అని ఏడ్చేవాడు.

ఈ లోపల విశ్వైక అమ్మ నాన్నలు వచ్చి “మా అమ్మాయిని మీ ఇంటి కోడల్ని చేస్కోవాలని, అసలు ఎప్పుడో వీళ్ల పెళ్లి జరగాల్సింది” అన్నారు. తను కూడా చాలాసార్లు విశ్వైక ఇంటికి వెళ్లి ఉండడం మూలాన్న వాళ్లకు తాను కొత్తేం కాదు. కూతురుకి తనంటే ఇష్టమన్న సంగతి వాళ్లకి తెలిసి తనని ప్రేమగా చూసుకునే వాళ్లు.

“నేను నీకు న్యాయం చేయలేనేమో విశ్వైకా” అని చాలాసార్లు చెప్పాలన్న తన ప్రయత్నాన్ని కొట్టి పడేసేది.ఆమెకి నిజమే చెప్పాలన్న శౌర్య మాటలే వెంటాడేవి. ధైర్యం చేసి “విశ్వా నేను “గే”ని ప్లీజ్ అర్థం చేస్కో” అన్నప్పుడల్లా  విశ్వైక పడి పడి నవ్వుతూ “ప్లీజ్ డోంట్ జోక్ విత్ మి”అనేది. ఇంకోసారి కోపగించుకునేది.”నన్ను బాధపెట్టకు ప్లీస్” అనేది దుఖంగా. దాంతో మధనపడ్డాడు. స్ట్రెస్‌కి గురయ్యాడు. శౌర్యను కోల్పోలేడు. శౌర్య లేనిది జీవించ లేడు. శౌర్యా అంతే! ఇక అమ్మకే చెప్పేసాడు . “నా వల్ల కాదు నేను శౌర్యతో రిలేషన్‌ షిప్‌లో ఉన్నాను. విశ్వైకకి న్యాయం చేయలేను, వాళ్లకి నో అని చెప్పేయండి”అని.అలా  విశ్వైకకి కూడా ఇంత ఖచ్చితంగా చెప్పేయ్యాల్సింది. ధైర్యంగా ‘నో ‘అని చెప్పలేకపోవడం ఇంత అనర్థానికి  దారి తీసింది. పైగా అమ్మ విశ్వైకకి తను “గే” అన్న విషయం చెప్పవద్దని ఒట్టు వేయించుకుంది.“చెల్లి గురించి ఆలోచించరా, నీ పెళ్లి అయితే చెల్లి పెళ్లి చేయవచ్చు” అని. ఇక ఇదంతా భరించలేక  తనెప్పుడైతే కఠిన నిర్ణయం తీసుకున్నాడో విశ్వైకని పెళ్లి చేస్కోనని అమ్మ నిద్ర మాత్రలు మింగేసింది. చచ్చి బతికింది, బతికి తన పెళ్లి విశ్వైకతో చేసింది.

****                                                                                                                                          ఇండియా వచ్చిన శౌర్య విషయం తెలిసి  డిప్రెషన్‌లో మునిగిపోయాడు. ‘మోసం చేసావని’ ఏడ్చాడు. ఆల్కహాల్ తాగడం,డ్రగ్స్ తీస్కోవడం మొదలెట్టాడు. తను  దగ్గరుండి కాపాడుకున్నాడు. శెలవు పెట్టి విశ్వైకని వదిలి శౌర్యని తీసుకుని పదిహేను రోజులు బెంగళూరు, గోవాలలో గడిపి, శౌర్యలో తనని ఎప్పటికీ వదలనన్న విశ్వాసాన్ని కలిగించాడు. తనకీ శౌర్య కావాలి. తెగించి అలా విశ్వైకతో, శౌర్యతో ఇద్దరితో జీవించడం  మొదలుపెట్టాడు. తనేమీ బై సెక్షువల్ కాదు.విశ్వైక మీద కోరిక కలిగేది కాదు. తన కోసం ‘వయాగ్రా’ వేస్కోని సెక్స్ చేయవలసి వచ్చేది. ఎందుకని అడిగేది విశ్వైక. “చెప్పాగా నాకు సమస్య ఉంది” అనేవాడు కానీ అసలు సమస్యల్లా  శౌర్యతో తన సంబంధం అని నేరుగా చెప్ప లేదు. చెబితే తాను ఏమైపోతుందో అన్న భయం.నిత్య నరకం అనుభవించసాగాడు. విశ్వైకతో బలవంతపు శృంగారం చాలా స్ట్రెస్ కలిగించేది.  విశ్వైక ధైర్యం చెప్పి యాండ్రాలజిస్ట్ దగ్గరకి తీసుకుని వెళ్లింది. ఆయన సెక్స్ హార్మోన్ ప్రొఫైల్ చేయించి పెద్ద సమస్య లేదని విటమిన్లు,వయాగ్రా లాంటి మాత్రలు రాసారు.ఆ మందుతో విపరీతమైన తల నొప్పి వచ్చేది.గుండె ఎక్కువ సార్లు కొట్టుకునేది.ఈ సైడ్ ఎఫెక్ట్స్ గురుంచి డాక్టర్ చెప్పాడు కూడా.”సతీష్ గారూ కొంచెం సైడ్ ఎఫెక్ట్స్ ఎక్కువ ఈ మందుకి.పరిమితంగామాత్రమే వాడాలి. అలవాటుగా వాడకూడదు.సహజమైన కోరికతోనే కలవాలి. మెల్లిగా మీరు ఈ టేబ్లేట్ మానెయ్యాలి. మీరు ఇద్దరూ ఒకసారి సెక్షాలజిస్ట్ ని కలిసి సెక్స్ థెరపీ, సెక్సువల్ కౌన్సిలింగ్ తీసుకోండి” అని చెప్పాడు. డాక్టర్ కి ఏం తెలుసు అసలు విషయం?                                                                                                                                                         విశ్వైక దగ్గర మంచు ముద్దలా గడ్డ కట్టిపోయేది తన శరీరం. అదే శౌర్య దగ్గర కోరికతో దేహం నిప్పుల కొలిమై రగులుతుంది. శృంగార వాంఛ హృదయంలో మృదంగంలా మోగుతుంది. శరీరం, సమస్త ఇంద్రియాలూ అతని మీద కోరికతో తీయగా మూలుగుతాయి. అతగాడి దేహంలోకి చొచ్చుకుపో యి, కలిసి ఒక్కటై పోయి,ఇక బయటకు రావద్ధనిపిస్తుంది. అతని కౌగిలిలో మైనపు ముద్దలా కరిగిపోతాడు. అలా చచ్చిపోయినా సరే అనిపిస్తుంది. శౌర్య తన  అనాది ప్రియుడు! యుగాలుగా వేచిన తరువాత,అనంతమైన దుఃఖవియోగ  కాలాల తపస్సు తరువాత దొరికిన తన ప్రాణ సఖుడు. అతను దగ్గర లేక పోవడం,అతని వియోగం హృదయాన్ని  దుఃఖంలో ముంచెత్తుతున్నది.ప్రియమైన వాడి దగ్గర ఉండలేక పోవడమంత దురదృష్టమేమైనా ఉందా ఈ లోకంలో?శౌర్య దగ్గరికి రెక్కలు కట్టుకుని వెళ్ళిపోవాలని ఉంటుంది. తనకి దూరంగా ఉంటున్న శౌర్యదీ ఇదే బాధ. విడిగా ఉండలేక పోతున్నారు ఇద్దరూ.వారంలో రెండు సార్లు మాత్రమే కలవడం అదీ రకరకాల భయాలతో,నియమాలతో,రహస్యంగా  కలవడం ఇద్దరికీ నరకంగా ఉంది.

***  

పెళ్ళైన ఈ ఏడాదిలో పెద్ద సమస్యలు రాలేదు. విశ్వైకకి తెలీకుండా శౌర్యతో తన సంబంధం కొనసాగుతూనే ఉండింది. విశ్వైక తనతో ఆనందంగానే ఉండింది. ఒక పక్క మనసులో విశ్వైకను మోసం చేస్తున్నానన్న పశ్చాత్తాపం తినేస్తున్నది. మరొక పక్క విశ్వైక మీద మనస్సులో తెలీని కృతజ్ఞత.తన కుటుంబం పరువు కాపాడిందనా?ఏమో ఇది అమ్మ మాట.తరచూ ఇలానే అనుకుంటూ కోడల్ని చూస్తూ మురిసి పోతూ రకరకాల కానుకలతో ముంచెత్తుతూ ఉంటుంది.తనలో కూడా ఎక్కడో అమ్మ నాన్నల ఆనందానికి కారణం అయిన విశ్వైక పట్ల ఒక ప్రేమ ఉంది. ఇటు  శౌర్యని ఒదులుకోలేని మమకార బంధం.ఎడారీ, వసంతం రెండూ ఒక్కసారి కమ్ముకున్నంటున్నట్లు అనుభూతి, ఉక్కిరిబిక్కిరతనం .అసలొక్కోసారి ఇద్దరినీ  ఒదిలిపెట్టి ఎటైనా అదృశ్యమై పోవాలనిపిస్తుంది. బలవంతపు పెళ్లి చేసిన అమ్మ,నాన్నల మీద కోపం వచ్చేస్తుంది.దుఖం కమ్మేస్తుంది.ఏంటీ జీవితమని విరక్తి వచ్చేసి ఆత్మహత్య చేసుకోవాలని కూడా అనిపిస్తుంది. మెల్లిగా ఆల్కహాల్,సిగరెట్లు ఎక్కువైనాయి.పిచ్చోడిలా తయరైపోతున్నాడు. అటు శౌర్య పరిస్థితీ అలాగే ఉంది.తనని మోసం చేసావని కుమిలిపోతూనే ఉంటాడు నిత్యం. ఒకసారి తన ఫ్రెండ్ వసంత్ దగ్గరికి వెళ్ళిపోయాడు.బాధ శ్రుతి మించినప్పుడల్లా అతనే దిక్కూ,గురువూ కూడా. ”చెప్పు వసంత్, ఇలాంటి పరిస్థితిలో ఏం చెయ్యను”? దు:ఖం మరిచి పోవడానికి  విస్కీ చేదుగా మింగుతూ అడిగాడు. వసంత్ తనలాగే ఒక “గే”. మరొక ‘గే’ని ప్రేమించి అతనితో సహజీవనం చేస్తున్నాడు. “విశ్వైకతో, ఖచ్చితంగా ఉండాల్సింది నువ్వు శౌర్యతో ప్రేమలో ఉన్నప్పుడు, పూర్తి “గే” వి అయినప్పుడు సమాజం కోసం, పరువు కోసం, కుటుంబం కోసం, ఇంట్లో బలవంతం చేస్తున్నారని, విశ్వైకని ఖచ్చితంగా తిరస్కరించే అవకాశం ఉండి కూడా నువ్వు ఎక్కడో, స్వార్థంగా, లౌక్యంగా ఉన్నావేమో అనిపిస్తుంది. కాస్తేంటీ బాగానే మోసపూరితంగా వ్యవహరించావు. అందర్నీ మోసం చేసావు. నిన్ను నువ్వు మోసం చేసుకున్నావు. ఖచ్చితమైన నిర్ణయం తీస్కోకుండా నువ్వూ నరకం అనుభవిస్తున్నావు. నాకూ వచ్చాయి సంబంధాలు. నన్నూ  అమ్మాయిలు ప్రేమించారు.కానీ నేను ఖచ్చితంగా తిరస్కరించాను.రిలేషన్షిప్స్ పట్ల చాలా బాధ్యతగా ఉండాలి. పేరేంట్స్ నిశ్చయించిన  అమ్మాయితో సహా కాదని స్పష్టంగా చెప్పాను. మా పేరేంట్స్ కూడా నన్ను,జేమ్స్ తో సంబంధం  ససేమిరా వద్దన్నారు. ఎమోషనల్ బ్లాక్ మెయిల్ చేసారు. నేను బయటకి వచ్చేసి నా పార్టనర్‌ జేమ్స్ తో బతుకుతున్నాను. ఎవరినీ మోసం చేయలేదు” అన్నాడు వసంత్. సతీష్ పశ్చాత్తాపంతో ముడుచుకుపోయాడు. కన్నీళ్లు చెంపలెంబడి ధారగా కారి పోసాగాయి. ”లేదు వసంత్, నేను విశ్వైక తో రెండు మూడుసార్లు నా సెక్షువల్ ఒరియంటేషన్ చెప్పాను. నన్ను నమ్ము. ఆమె అసలు సీరియస్ గానే తీసుకోలేదు. నేను తనని పెళ్లి చేసుకోవడం నుంచి తప్పించుకుందామని నేను అబద్దం ఆడుతున్నానుకుంది. ఆమె నన్నునమ్మలేదు” సతీష్ బాధగా అన్నాడు. ”నువ్వు చెప్ప వలసినంత గట్టిగా , స్థిరంగా చెప్పలేదంటున్నాను. సరే ఇప్పటికైనా ఫరవాలేదు. ఏదో ఒక నిర్ణయం తీసుకో. నీ భార్యతో స్పష్టంగా మాట్లాడు. ముందు ముందు చాల జీవితం ఉంది. ఈ నిత్య ఘర్షణ, బాధ వద్దు. పైగా నీ భార్యతో సెక్స్ లో పాల్గొనడానికి నువ్వు తీసుకునే వయాగ్రా టేబ్లేట్ వల్ల సైడ్ ఎఫెక్ట్స్ వస్తున్నాయని అంటున్నావు. ఈ బాధ అంతా ఎందుకు చెప్పు? నిర్ణయం ఇప్పుడైనా ఖచ్చితంగా తీసుకుంటే ముగ్గురి జీవితాలు బాగు పడతాయి కదా, ధైర్యం చేయాలి నువ్వు? “వసంత్ ఓదార్పుగా అన్నాడు.”నేను చెప్పే ప్రయత్నం చేసినప్పుడల్లా తను హాస్యంగా కొట్టిపడేసింది, కానీ ఇప్పుడు ఆమెకి నిజం తెలిసిపోయింది. నేనూ, శౌర్యా కలయికలో ఉన్నప్పుడు చూసేసింది. షాక్ లోకి వెళ్లి పోయింది, తట్టుకోలేక పోయింది. దివారాత్రుళ్లు ఏడుస్తూనే ఉంది, నాతో మాట్లాడడం లేదు” అన్నాడు సతీష్. “ఎప్పుడో ఒకప్పుడు బయటపడాల్సిందే కదా, మంచిదే అయింది. మాట్లాడు కన్విన్స్ చేయి షాక్ తగ్గి, బాధపోయి నార్మల్ అవడానికి  కొన్ని రోజులు పడుతుంది. షీ ఈజ్ ఇన్ పోస్ట్ ట్రామాటిక్ స్ట్రెస్ డిజార్డర్. బాధగా ఉంది విశ్వైకని తలుచుకుంటుంటే. నేను కూడా మాట్లాడతాను” అన్నాడు వసంత్.

ఈ సంభాషణను గుర్తు చేసుకుంటూ ఎంత దూరం నడిచాడో  చూస్కో లేదు సతీష్. “మాట్లాడాలి విశ్వైకతో, కానీ ఆమె తనని ఒదిలి ఉండగలదా? “ఏమో చెప్ప లేం ఆమె ఆత్మ గౌరవం దెబ్బతిన్నది తను మోసం చేసాననుకుంటుందా? తనని అసహ్యించుకోవట్లేదు కదా?సతీష్ దిగులుగా ఇంటి వైపుకి నడిచాడు.

**

ఎంతగా ప్రేమించి, ఎంత ఇష్టంగా చేస్కుంది సతీష్‌ని? తనని ఎంతమంది ప్రేమించినా కాదని సతీష్ తనకు దొరికిన వరమని, ఎంత తపస్సు చేస్తే దొరికాడో కదా అని మురిసిపోయి,  వెరవకుండా ప్రేమ లేఖలు రాసీ, వెంటపడీ, వెంటపడి అతని ప్రేమని సంపాదించుకుందని?నాన్న కూడా వాళ్లు మిడిల్ క్లాస్, ఆస్తులేమి లేవు అని గొణిగినా అతన్ని తప్ప మరొకర్ని చేస్కోనన్న తన మొండి పట్టుదల ముందు తలవొంచాడు.సతీష్ పెళ్లికి పెద్ద ఉత్సాహం చూపించని తనం అర్థమవుతున్నా తను తేలికగా తీసుకుంది. ఏవో పనుల ఒత్తిడి, ఇంట్లో సమస్యలు అనుకుంది. ప్రేమ గుడ్డిది మొత్తానికి. తను ‘గే’ అని  చెప్పడానికి ప్రయత్నం చేసాడు కూడా.తానే తేలిగ్గా కొట్టి పడేసింది. నమ్మలేదు.తనని పెళ్లి చేసుకోవం తప్పించుకోవడానికి అలా నాటకాలు ఆడుతున్నాడు అనుకుంది.ఎంత పెద్ద షాక్ ఇది తనకి? ప్రపంచం తలకిందులవ్వడం, లోకం అంధకారం అవడం అంటే ఏమిటో బాగా అర్థం అయింది. అసలు తనకి కొంచెం కూడా అనుమానం రాలేదు. పెళ్లైనాక చాలా సంతోషంగా ఉన్నారు తామిద్దరు.సతీషే లోకంగా బతికింది తను. సతీష్ కూడా చాలా బాగుండేవాడు. జీవితానందం అంటే ఏంటో తెలిసొచ్చిన క్షణాలవి. మూణ్ణెల్లు ఇట్టే గడిచిపోయాయి. మధ్య మధ్యలో సతీష్ ప్రవర్తన ఆశ్చర్యాన్ని, బాధనీ కలిగించినా అతని పట్ల ఉన్న అవ్యాజ్య ప్రేమ వలన సర్దుకుపోయేది. నిత్యం అతన్ని సంతోషంగా ఉంచడానికి ప్రయత్నించేది. నాన్న త్రీ బెడ్రూమ్ ఫ్లాట్ పెళ్లి కానుకగా ఇచ్చాడు. ఇద్దరూ అందులోనే ఉండేవారు. అత్తమామ వాళ్లు, వాళ్ళ ఇండిపెండెంట్ హౌస్‌లోంచి రామన్నారు. తమ ఇద్దరి అభిరుచికి తగ్గట్లుగా ఇంటిని రకరకాలుగా అందంగా అలంకరించుకునేది. తను సతీష్‌ని సంతోషంగా ఉంచడానికి ప్రయత్నించేది. కానీ సతీష్ చాలాసార్లు మూడీగా, డిప్రెస్సడ్ గా కనిపించేవాడు. తనతో సెక్స్‌లో పెద్దగా ఆశక్తి చూపించేవాడు కాదు. అడిగితే స్ట్రెస్ అనే వాడు. డాక్టర్ దగ్గరికి తీసుకెళ్లింది కూడా.గంటలు గంటలు ఫోన్‌లో మాటలు, వాట్సాప్ ఛాటింగ్‌లు చేస్తూ, ఫోన్ లో ఏవో దిగులు పాటలు వింటూ గడిపేసేవాడు. అర్థరాత్రి పక్కన కనిపించేవాడు కాదు. లేచి చూస్తే ఇంకో బెడ్ రూమ్‌లో తలుపులు వేస్కోని కనిపించేవాడు. “ఏంటిది” అంటే “నాకు కొన్నిసార్లు ఏకాంతం అవసరం అనిపిస్తుంది విశ్వా ఏమీ అనుకోకు” అనేవాడు.  తనకు బాధ కలిగేది. తనను కాదనుకునే ఏకాంతం ఏమిటీ, అదీ అర్ధరాత్రిళ్లు అనిపించేది. అతని కొలీగ్ అడ్వకేట్ శౌర్య ఎప్పుడూ వెన్నంటి ఉండేవాడు. ఇంట్లోని ఆఫీస్ రూంలో, ఒక్కోసారి గెస్ట్ బెడ్‌రూమ్‌లో గంటలకొద్దీ గడిపేవారు. “ఆఫీస్ వర్క్, అవే కేసులు డిస్కస్ చేస్తున్నాం” అనే వాడు తనతో ఏదో తడబాటుని దాచుకుంటూ. వాళ్లిద్దరూ ప్రాణ స్నేహితులకంటే కూడా ఎక్కువ చనువుగా ఉండేవాళ్లు. తన కళ్ల ముందే సతీష్‌ని ఉన్నట్లుండి కౌగలించుకునేవాడు శౌర్య. ఆ కౌగిలి ఇద్దరు మగ స్నేహితుల సాధారణ కౌగిలిలా అనిపించేది కాదు.ఇద్దరు ప్రేయసీ ప్రియుళ్ళ మోహ కౌగిలిలా, విడిపోవడానికి ఇష్టపడని సుదీర్ఘ కాలానంతర సంగమాలింగనంలా అనిపించేది. చాలా దగ్గరగా రాసుకుంటూ కూర్చొనే వాళ్లు ఇద్దరూ. శౌర్య, సతీష్‌ను చూసే చూపులు కూడా వింతగా ఉండేవి. ఎంతో ఇష్టంగా ఒక మైకంలో ఉన్నట్లు,ఒక అద్భుతాన్ని చూసినట్లు చూసేవాడు. మళ్ళీ కనిపించడేమో అన్న లాలస కనిపించేది అతని కళ్ళల్లో. శౌర్య  చూపులకు సతీష్ బ్లష్ అవడం తనకు వింతగా అనిపించేది. తనకు ఏవో అనుమానాలు రాసాగాయి. కొన్నిసార్లు సతీష్ ఉన్నట్లుండి వారం రోజులంటూ గోవా, బాంబే, బెంగళూరు సిటీలకి కంపెనీ  అఫిషియల్ ప్రాజెక్ట్ ట్రిప్స్ అంటూ వెళ్లిపోయేవాడు. అలా వెళ్లొచ్చాక చాలా హ్యాపీగా కనిపించేవాడు.ఏవో పాటలు పాడుకుంటూ ఉల్లాసంగా కనిపించేవాడు.తనతో కూడా సంతోషంగా గడిపేవాడు. సతీష్ టూర్లకి వెళ్ళిన సమయంలో శౌర్య  కూడా సిటీలో కనిపించేవాడు కాదు. ఇలాగే తొమ్మిది నెలలు గడిచి పోయాయి. ఇదంతా తనకు ఎంతో ఆత్మీయంగా మారిపోయిన సతీష్ చెల్లెలు రజనీతో చెప్పుకునేది తను. ఆమె దగ్గరా సమాధానం లేదు. “మీ అన్న శౌర్యతో అంత చనువుగా ఎందుకుంటాడు?” అనే తన ప్రశ్నకి “నువ్వు కాస్త ఎక్కువగా ఆలోచిస్తున్నావేమో  వదినా” అనేది రజని గాభారాగా. రజని ఏదో దాస్తుందేమో అనిపించేది. తనకి తన ‘లా’ ప్రాక్టీస్  మీద ఆసక్తి పోయింది. ఏదో బాధ, దు:ఖం ఒంటరితనం తనని వేధించసాగాయి. శౌర్యకి,సతీష్ కి మధ్యలో ఏదో జరగరానిది జరిగిపోతున్నది అన్న విషయం తనని నిత్యం వేధించ సాగింది.శౌర్య తనకు తెలిసిన కార్పొరేట్ కంపెనీలో లా ఫర్మ్‌లో ఉద్యోగం ఇప్పిస్తాన్నాడు. తనే ఒద్దంది. అలా సాగుతున్న తన జీవితంలో త్సునామీ ఒక్కసారి వచ్చిపడింది. ఒక రోజు ఒక ఎల్.ఎల్.బీ కాలేజీకి గెస్ట్ ట్యూటర్ గా  నాలుగు రోజులు సదస్సుకు విజయవాడకి వెళ్లాల్సి వచ్చింది. కానీ సదస్సు మూడు రోజుల్లోనే ముగిసి పోయింది. మధ్య మధ్యలో సతీష్ నుంచి మెసెజీలు వస్తూనే ఉన్నాయి.”ఎప్పుడు వస్తున్నావు డియర్’ ‘మిస్ యూ’, ‘ఐ లవ్యూ” అంటూ. అవేవి తనకి ఆనంధాన్నివ్వడం లేదు. ఇన్నేళ్ల ప్రేమ, ఆకర్షణ ఎటు పోయాయో  అర్థం కాలేదు. టూర్ ముగిసాక  తను విజయవాడ నుంచి  హైదరాబాద్‌కి బయలుదేరింది. ఫ్లాట్‌కి వచ్చి తన దగ్గర ఉన్న ఎక్స్ ట్రా కీస్‌తో మెయిన్ డోర్ తెరవబోయింది. కానీ తలుపు లాక్ వేసి లేదు. ఆ సమయంలో సతీష్ ఆఫీసులో ఉంటాడు. ఆశ్చర్యంగా లోపలికి వెళ్లింది. హాల్లో షూస్ శౌర్య వే. బెడ్రూంలోంచి ఏవో శబ్దాలు, చిన్న అరుపుల్లాంటివి వినిపిస్తున్నాయి.నేపధ్యంలో ఏదో సంగీతం అలలు,అలలుగా హాల్లోకి వినిపిస్తోంది. మెల్లగా శబ్దం లేకుండా వారగా వేసి ఉన్న తలుపులను తోసింది. ఎదురుగా కనిపించిన దృశ్యం తనలో ప్రకంపనలు సృష్టించింది. ఒణికిపోయింది. స్థాణువైపోయింది మెదడు స్తంభించిపోయింది. మంచం మీద సతీష్, శౌర్య  పూర్తిగా నగ్నంగా ఉన్నారు. పక్కనే ల్యాప్టాప్‌లో సతీష్‌కి ఇష్టమైన ఫంకజ్ ఉదాస్ హిందీ గజల్ “ఆఫ్ జిన్ కే కరీబ్ హో తే హై, ఓ బొహత్ ఖుష్ ససీబ్ హోతే హై”{నువ్వు నిత్యం ఎవరి దగ్గరగా అయితే ఉంటావో,వాళ్ళు చాలా అదృష్టవంతులు”} వినిపిస్తోంది.ఇద్దరూ మైమరచి ఉన్నారు. దృఢమైన సతీష్ పూర్తిగా శౌర్య  వీపు మీద వాలిపోయి ఉన్నాడు. ఆ పురుషులిద్దరి నఘ్న దేహ సౌందర్యం ఆ సాయం సంధ్యప్పటి సన్నని వెలుగులో మిల మిలా మెరిసిపోతున్నది. ఇద్దరి దేహాల  కదలిక  పెనవేసుకున్నరెండు  పాముల నృత్యంలా ఉంది. గదిలోంచి ఏదో పరిమళం, వాళ్లెంతగా నిమఘ్నమైపోయి ఉన్నారంటే తనను అస్సలు గమనించనే లేదు. “స్టాపిట్” అంటూ అరిచింది తను. అది తనకే తీవ్రమైన నొప్పి భరించలేక పెట్టిన  ఆక్రందనలాగా వినిపించిది. వాళ్లిద్దరూ ఒక్కసారిగా తేరుకున్నారు.ఒకరి నుంచి ఒకరు విడిపోయి, ఖంగారు,ఖంగారుగా దుప్పట్లు కప్పుకుని బట్టలు వెతుక్కుంటూ దొరికినదాంతో ఒళ్లు కప్పుకుంటున్నారు. అంటే,ఇన్ని రొజులూ సతీష్ తనొక ‘గే’అని చెబుతూ వస్తున్నది అబద్దం కాదన్నమాట . ఈ పచ్చి నిజం కళ్ళెదుట సాక్షాత్కరించి తనని నిలువెల్లా వణికించింది.

సతీష్ పరమ వింతగా, కొత్తగా కనిపించాడు. సిగ్గుతో, ఖంగారుగా పక్క చూపులు చూస్తున్నాడు. తను గుండెలదిరి పోతూ ఉంటె ఖంగారుగా గది బయటకు,వాకిలి బయటకి పారిపోతూఉంటె, వెనక నుంచి,సతీష్ “విశ్వా ఆగు, ఐ  కెన్ ఎక్స్ప్లెయిన్” అంటూ అరుస్తున్నాడు.

**

“విశ్వా నన్ను క్షమించు. నీకు ఈ విషయం క్లియర్‌గా చెప్పాల్సింది” అన్నాడు సతీష్ ఎక్కడో కిటికీ అవతల ఎండిపోయినట్లున్న ఆకాశాన్ని చూస్తూ. విశ్వైక ఏం మాట్లాడలేదు.”భయపడ్డా విశ్వా. ఇంట్లో ఒత్తిడి ఎక్కువైంది. పైగా నీకు చెప్పాలని ప్రయత్నిస్తే నువ్వు లైట్‌గా తీసుకున్నావు నమ్మనే లేదు. అయినా నేను అసలు విషయం ఇదీ అని స్పష్టంగా  చెప్పాల్సింది. నాదే తప్పు. అమ్మ, చెల్లె కోసం ఎక్కడో నాలో స్వార్థం పని చేసింది” కన్నీళ్లు తుడుచుకుంటూ చెప్పాడు సతీష్.విశ్వైక అభావంగా చూసింది అతన్ని.

“ఇంకో విషయం విశ్వా! నాకీ జీవితం వద్దు. రెండు మొఖాలేసుకుని, ఇద్దరు మనుషుల్లా బతకలేను. నేను బైసెక్సువల్‌ని కాను విశ్వా పూర్తిగా “గే”ని. పరిపూర్ణమైన ‘గే’ ని. ఐ యామ్ ఏ ప్రౌడ్ ‘గే’ఎస్!”ఈ మాటలని సతీష్ చాలా స్థిరంగా, ఒకింత గర్వంగానూ అన్నాడు.ఆ క్షణాల్లో విశ్వైక అతని వైపు చాలా  అబ్బురంగా చూసింది. సతీష్ తన మాటలు కొనసాగించాడు.”చూడు విశ్వా నా మాటలు జాగ్రత్తగా విను దయచేసి.నీకు బాధ కలిగించినా,నాకు నీ పట్ల ప్రేమే గానీ, కోరిక లేదు.నీ స్పర్శకి ప్రతిస్పందించడం కోసం,ప్రమాదకరమైన  మందులు వేసుకుంటూ,  నీతో కృతకమైన సెక్స్ జీవితాన్ని గడపలేను.నాలోని హార్మోన్లని బలవంతంగా  ఉద్రేక పరుచుకోలేను. సెక్స్ అనేది హైబ్రిడ్ పంటలాంటిది కాదు కదా విశ్వా. భూమి గుండెల్లో మొలకెత్తడానికి సిద్ధమై పగలబోయే విత్తనం లాంటిది సెక్స్. ఏ వెన్నెల రాత్రో రహస్యంగా తోటలో వికసించే పరిమళ పుష్పం లాంటిది సెక్స్. సంయోగంలో దేహాలు పుష్పాల్లా వికసించి ఆక్సిటోసిన్ లాంటి ప్రేమ హార్మోన్ల సహజ పరిమళాలు వెదజల్లాలి కానీ, వయాగ్రాల,సెక్స్ విటమిన్ మందుల రసాయనాల వాసనలు రాకూడదు కదా?నిన్ను శారీరికంగా కలవాలంటే నేను నా రక్తంలోకి చలనం తేవడానికి మందులని పంపించాలి. అసలు ప్రియురాలి ఊహే, స్పర్శే రక్త నాళాల్లో కోరికల్ని ఉరుకులెత్తించాలి. నీ దగ్గర నాకివేవీ అనిపించవు విశ్వా. ఎందుకంటే నా ప్రియురాలువి నువ్వు కాదు, శౌర్య! అవును శౌర్యే నా ప్రియురాలు, ప్రియుడు రెండూను. ఇలా అంటున్నందుకు నన్ను క్షమించు. నాకు శౌర్య కావాలి. శౌర్యతోనే నా మనోదేహాలు వికసిస్తాయి. నేను నిజమైన మనిషిలా ఉంటాను. నటించను జీవిస్తాను. విశ్వా ఇప్పటికైనా ఇష్టం వచ్చినట్లు జీవించాలని ఉంది. నేనిక నటించలేను. నాకిక ముక్తి ప్రసాదించు. నన్ను క్షమించు, నీ ప్రేమతో నన్ను కరుణించు. నన్ను శౌర్య దగ్గరికి పంపించు. నాకు శౌర్య నివ్వు. నిన్నొక దేవతలా పూజించుకుంటాం నేనూ, శౌర్యా ఇద్దరమూ” వలా వలా ఏడుస్తూ విశ్వైక కాళ్ల మీద పడ్డాడు సతీష్.

విశ్వైక నిర్ఘాంతపోయింది.తన పాదాల దగ్గర కుప్పకూలిపోయి,శౌర్య ప్రేమ కోసం వల,వలా దుఃఖిస్తున్న సతీష్ ని ఒక అద్భుతాన్ని చూస్తున్నట్లు,కళ్ళకప్పుడే చూపొచ్చినట్లు అలా చూస్తూ, చూస్తూ ఉండి  పోయింది శిలలా. తన మీద కాకుండా, శౌర్య మీద సతీష్‌కి అంత ప్రేమ, నిజమైన ప్రేమ , తనని కాదనుకునే ప్రేమ, శౌర్య దగ్గరికి చేర్చమని విలవిలా దు:ఖిస్తూ కాళ్ళ మీద పడి  వేడుకునేంత ప్రేమ ఉండడం ఆమెని నిర్ఘాంత పరుస్తున్నది.విశ్వైకలో ఏదో జరిగిపోతోంది.గత నెల రోజులుగా వాళ్ళిద్దరిని ఒక దగ్గరగా చూసినప్పటి నుండి ఆమె మేధలో ఏవో ఆలోచనలు అల్లిబిల్లిగా ప్రేమకి,శాస్త్రీయతకి మధ్య నలిగిపోతూ సుళ్ళు తిరుగుతున్నాయి. ఎన్నో కేసులు చుసిన  ఒక లాయర్ గా న్యాయాన్యాల మధ్య ఆమె నలిగిపోతున్నది. ఆమెలో మెల్లిగా స్పష్టత ఏదో వస్తోంది. పొరలు పొరలుగా ఆమెలో ఏదో విడిపోతున్నది. సతీష్ ని లేపి వోదార్చాలని కూడా అనిపించలేదు. వోరగా అతన్ని చూస్తూ ఏడవనీ, ప్రేమ కోసమేగా ఏడుస్తున్నాడు అనుకుంది. ఆమె కన్నీళ్లు తుడుచుకుంటూ కింద పడి దుఃఖిస్తున్న సతీష్‌ని తప్పుకుని నిదానంగా గది బయటకు వెళ్లిపోయింది.

**

“లేదు నాన్నా, నాకే బాధా లేదు. నేను సతీష్‌ని ప్రేమించింది నిజం. అయితే  అతనికి నా మీద ప్రేమ లేదన్నదీ అంతే నిజం. నేనే అతన్నిబాగా  బలవంత పెట్టాను. అతను నాకు తన సెక్సువల్ ఐడెంటి టీ ని చెప్పాలని ప్రయత్నం చేసినప్పుడల్లా కొట్టిపడేసేదాన్ని. అతనికి ఇంకో స్త్రీ మీద ప్రేమ, మోహం ఉంటే బాధ కలిగేది. నాన్నా కానీ అతనికి తనలాంటి మరో పురుషుడి మీద ప్రేమ, ఆకర్షణ ఉన్నాయి. అతను“గే”అని తెలిసి నా దగ్గర కొంత కాలం దాచాడు కూడా. అదీ నన్ను బాధపెడుతోంది.అయితే నిజాయితీగా  చెప్పటానికి ప్రయత్నించాడు. నేనే పెద్దగా పట్టించుకోలేదు నాన్నా. పైగా వాళ్లమ్మ ఆత్మహత్యా ప్రయత్నం చేసింది.నేను కూడా, నన్ను చేసుకోక పోతే చచ్చిపోతానని బెదిరించాను. నేను చాలా ఆలోచించాను నాన్నా”. విశ్వైక తండ్రి భుజాల మీద తలవాల్చి మెల్లిగా అంది. కుళ్ళి కుళ్ళి ఏడుస్తున్న తల్లిని దగ్గరికి తీసుకుని ఏడవద్దన్నట్లు తల ఉపుతూ మెల్లిగా కళ్ళు తుడిచింది.

“కోరికలు, ఇష్టం లేకపోయినా అతన్ని నాతో జీవించమనడం తప్పు నాన్నా. అతన్నైనా ప్రేమించిన మనిషితో బతకనిద్దాం. వద్దు! నువ్వెవరితోనూ మాట్లాడొద్దు. నాతో మీ పెద్దవాల్ళందరూ బలవంతపు కాపురం చేయిస్తే చచ్చిపోతాడు నాన్నా వద్దు. మాట్లాడినా నేను అతనితో ఉండను.అతనూ నాతో ఉండడు.శౌర్యను అతడు గాడంగా ప్రేమిస్తున్నాడు. ప్రేమికులను విడదీయడం పాపం నాన్నా. ప్రేమలో ఉండడం ఎంత అద్భుతంగా ఉంటుందో నీకు తెలుసా అమ్మా? అతను, శౌర్యతో ఉండడమే న్యాయం నాన్నా. వద్దు నాన్నా “గే” గా బతకడం, పురుషుడి మీద పురుషుడికి  ప్రేమా, ఆకర్షణ ఉండడం తప్పు కాదు నాన్నా! ప్రకృతంత, సూర్యోదయమంత, స్వచ్ఛమైన జలపాతమంత, తోటలో పూసే పువ్వుంత సహజమైంది నాన్నా. అవునమ్మా నువ్వు నాన్నని, నాన్న నిన్ను ప్రేమించినంత సహజమైంది అమ్మా. అతన్ని, నాతో కలిసి బతకమనడమే అసహజం,నేరం! అమ్మా వదిలెయ్, ఏడవకు. నా జీవితం ఏమవుతుందీ చెప్పు? ఏమీ కాదు, కోలుకుంటాను. నా జీవితం ఇంకా చాలా మిగిలే ఉంది అమ్మా. కాకపోతే సతీష్‌ని మరిచిపోవడానికి కాస్త సమయం పడుతుంది. అమ్మా, అన్నట్లు సతీష్-శౌర్య వాళ్ల కొత్త ఇంటికి లంచ్‌కి పిలిచారు. నేను వెళ్లాలి. ఏం లేదమ్మాఅక్కడ వాల్లిధ్ధరినీ చూసి  నేనేం బాధ పడను. నిజమైన  ప్రేమికుల్నికలిపిన సంతోషంగా ఉంటాను ఏం? సతీష్ సంతోషమే నాకు ముఖ్యం అమ్మా.నేనేం త్యాగం చేయలేదు. న్యాయంగా జరగాల్సింది జరిగేట్లు చేసాను. సరే అమ్మా రాత్రి తొమ్మిది కల్లా వచ్చేస్తాను. మీరిద్దరూ డిన్నర్ చేసెయ్యండి” విశ్వైక గుండెల్లో బాధ అణుచుకుంటూ తన గదిలోకి వెళ్ళింది. మెల్లిగా  గోడ మీద ఉన్న తనవి, సతీష్‌వి పెళ్లి ఫోటోలు తీసేసి బీరువాలో సర్దేసింది. ఇంతలో సతీష్ ఫోన్ మోగింది. “సతీష్, హా  దార్లోనే ఉన్నా వస్తున్నా పది నిమిషాలంతే” అంది విశ్వైక.

**