అందెశ్రీ కి అక్షర నివాళి

పల్లవి:

అందెశ్రీ అల్లిన
అక్షరాల పూలమాల
తెలంగాణ తల్లి మెడలోవేసి
పాడేము జయజయ హేళ
అందెశ్రీ కి జోహారులంటూ
తెలంగాణ తల్లికి జేజేలంటూ

                                    ||అందెశ్రీ||

చరణం 1)

సంక్షోభ సమరాల వేళా
సరిగమలు శాంతినిచ్చేలా
ఎండిన తెలంగాణ నేలా
సాహిత్య జగతి నేలేలా
నిప్పుల వాగొకటి నీ హృదయ జ్వాలా
పంటలై పండేల వెలుగులై నిండేలా
జోహారులంటూ పాడేమో నీకు
జయ జయ గీతాల వీడ్కోలు నీకు

                                      ||అందెశ్రీ||

చరణం 2)

పశువులను కాసిన వేళా
కాపరనుకుందామా నీలా
నాగలి దున్నేటి రైతులా
సేద్యగాడిని మరిచేలా
దుంకినా మత్తడిలో అక్షర గలగలలు
బింక మెరుగని మది వేస్తున్న చిందులు
జోహారులంటూ పాడేము నీకు
అరుణోదయాన వీడ్కోలు నీకు

అందెశ్రీ నీవెంట
జనకవుల సేన
మాయమే కాలేని
కళవైన తావునా
తెలంగాణ చరితలో తేజస్సువైనావు
జనమాగాణాల్లో మొలకలై పుడతావు

మిత్ర

పుట్టింది కరీంనగర్ జిల్లా వేములవాడ. కవి, రచయిత, గాయకుడు. విప్లవోద్యమ నాయకుడు. అసలు పేరు కూర దేవేందర్. కలం పేరు మిత్ర. అమర్ పేరుతో సీపీఐ(ఎం.ఎల్.) జనశక్తి రాష్ట్ర కార్యదర్శిగా పనిచేశాడు. రచనలు : 1. మిత్ర తెలంగాణ పాటలు, 2. పొదుగు, 3. వరుపు, 4. మిత్ర జనం పాటల సవ్వడి (పాటలు); 5. చితాభస్మంలోంచి...(కవిత్వం); 6. తెలంగాణ డప్పు దరువు, 7. తెలంగాణ ధూం ధాం, 8. తెలంగాణ కోలాటం పాట, 9. ముంబై తెలంగాణం, 10. బహుజన బతుకమ్మ, 11. వీరతెలంగాణ (నృత్యరూప గానాలు).