ఈ దేశం ఒక రహస్యాంగం
సామూహిక ఆరాధన నిత్యకృత్యం
ప్రజలు సుఖరోగంతో తన్మయులై వున్నారు
*
కూలదోసిన పాఠశాల గోడలపై అంటించిన
సంస్కృతంలో లిఖించిన దేశ పటాన్ని
ఆవుగారు తీరిగ్గా నెమరేసుకుంటున్నారు
*
కొత్తగా కట్టిన గోడ వెనుక
గజగజలాడే పేదరికాన్ని గజాల్లెక్కన
విదేశీ షరాబులు ఖరీదు చేస్తున్నారు
*
శృంగార చిత్రానికి ముందేసిన
జాతి గీతం అందరినీ నిలబెట్టిందన్న
స్వయంతృప్తి కొందర్నింకా మైమరపిస్తూనే వుంది
*
హలీమ్ సుహృద్భావపు లొట్టల్లో
మేకపోతు గాంభీర్యం ఒలకబోసిన నెలవంకకు
బట్టీల్లో అలాయ్ బలాయ్ వంకలుతీస్తున్నారు
*
గాయాల గొంతు విప్పిన వాగ్గేయులను
శిలువ మీంచి దించకుండానే
రాజ్యాంగం వాయిదాల సుత్తి కొడుతోంది
*
సేద్యం చేసి స్పూన్లు మొలకెత్తించలేని
రైతులు, ఆరుగాలాలు పంట చేలలో
నాగలి కర్రుకు నాన్-వెజ్ రుచి చూపిస్తున్నారు.
*
పేదరాశి పెద్దమ్మ చెప్పిన
దారి బట్టిన బ్యాంకులోళ్లు
విదేశీ మత్స్య రాజాల కోసం
తూర్పు తిరిగి దండమెట్టేసారు
*
కండబలంతో జెండాను రెపరెపలాడించినవారు
శివధనుర్భంగ సన్నివేశంలో కన్నీళ్లు ఒత్తుకుంటుంటే
మురిసిపోయిన ఫునిస్త్రీలంతా మంగళసూత్రాలను కళ్లకద్దుకుంటూ
నగర సంకీర్తనలో శీలాన్ని వేలం వేస్తున్నారు
*
పుటం పెట్టని పటం ముక్కల్ని
గర్భకుహరంలో గాజు పెంకుల్లా దించిన వాళ్లు
నడిబొడ్డున అతిమూత్ర వ్యాధితో బాధపడుతుంటే
ఈశాన్యం నగ్నంగా హోలీ ఆడుతోంది
*
గాలివానల నుంచి తట్టుకునేందుకు
కొత్త కోట నిర్మించుకున్న రాబందు
ప్రవచించిన సనాతన ధర్మానికి
శాంతి కాముకులు మురిసి ముక్కలవుతూనే వున్నారు
*
జాతీయ జంతువుగా ప్రకటించనందుకు
విశ్వాసం నిశ్వాసమైన కుక్కులను వెంటేసుకుని
హరి నివాసంలో పిడికిలి బిగించిన పౌరులు
భౌ.. భౌమని మొరుగుతూనే వున్నారు.
The present position the State is very well shown