గూడు చెదిరిన పక్షులు

వర్గ స్పృహను
దారిమళ్లించామనే
సంబరంలో
ఆస్తిత్వవాదాలు
తలమునకలై ఉన్నాయి..

ఎక్కువ తక్కువల
తకరారుల్లో
సకల జన సంవేదనలు
అలసి పోతున్నాయి..

ఎత్తుగడలు
తలగడలుగా
రూపాంతరంచెంది
శ్రామిక జన
పోరాట పటిమకు
లాభ నష్టాల
లాబీయింగులద్దడంలో
రివిజనిస్టు ప్లీనరీలు
వాదులాడు కుంటున్నాయి..

కడలి అలలకు
కౌగిళ్లను పరిచే
మైదానలిప్పుడు
కాల్చేతులాడని
పక్షవాతాల్లో
కాయకాల్ప చికిత్సకోసం
కన్నీరింకిన కళ్ళతో
దిక్కులు చూస్తున్నాయి..

రాజ్యం రాజేసిన
అధర్మ యుద్ధ
విద్రోహ దహనాల్లో
పచ్చని అడవి
ధగ ధగా
అంటుకుపోతున్నది..

అయినా…

గూడు చెదిరిన పక్షులు
గుండెలవిసేట్లు
విలపించడం లేదు..

కనుకొలుకులు
దాటని చెమ్మను
కందెనలు చేసుకుని
విల్లంబుల మొనలకు
పదునులద్దుకుంటునాయి..

ఒరిగిన సహచరుల
వొడవని జ్ఞాపకాల్ని
ఆరని కుంపట్లుగా
కళ్ళల్లో రాజేసుకుంటూ..

గుండె దిటవు చేసుకొని 
ప్రసవించే ఉదయాలకోసం
తూరుపు లోగిళ్ళ
పురిటి పాన్పులు
సిద్ధం చేసుకుంటాయి..

అంతిమ యుద్ధంగా
విరుచుకు పడుతున్న
కంగాలీ దాడుల్ని
అంతం చేయడానికి
సన్నధ్ధ మౌతాయి…

ఇక్బాల్

పుట్టిన ఊరు కొల్లాపూర్ - వరిదేలవీధి(1960లో), ఇప్పటి నాగర్ కర్నూల్ జిల్లా. నేపథ్యం: దోయబడ్డ బాల్యం, కష్టాలు కన్నీళ్లు, ఆకలి అవమానాలే తోబుట్టువులు. చెమట సౌరభాల మడి అమ్మవడే బడిగా... తలాపున నల్లమల అడవే ఆట మైదానంగా... ఎలుగెత్తి పారే కృష్ణా నది చేతికందే దూరంలో ఉండీ గొంతు తడవని దాహంతో ఏళ్లకేళ్లు కురవని మేఘాలతో పరుగు తీసే మేకలతో, చెట్టు పుట్టలతోచెట్టా పట్టాలేసుకు సాగిన సాహచర్యం. వృత్తి: న్యాయవాదం. ప్రవృత్తి : సాహిత్య అధ్యయనం. 1978 నుండి కవిత్వం, పాట, వ్యాసం, కథా, చిత్ర, నాటిక రచన, నటన. రచనలు : 1. 'స్పందన'( కవితా సంకలనం) 1985 గద్వాల్ విరసం రాష్ట్ర సభల్లో ఆవిష్కరణ. 2. 'సేద్యం' (కవితా సంకలనం), 3. 'కఫన్' (కథా సంకలనం), 4. సాంగ్ ఆఫ్ ఫర్రోస్ (కవిత్వం) ( ఆంగ్లానువాదం: అర్విణి రాజేంద్రబాబు గారిచే), 5. 'రాహేc', 6. 'జాబిలి ఖైదు', 7. 'దగ్ధ స్వప్నం' (కవితా సంకలనాలు ప్రచురించారు.)