అలసిన మనసు

చరిత్ర వాకిలి ముందు పరుచుకున్న
నా జీవిత తెరలను ఒక్కొక్కటి విప్పి చూసినప్పుడు అందులో మాసిపోని వేదనలే నవ్వుతూ కనబడ్డాయి

క్షణాలను అరచేతుల్లోకి ఒంపుకొని
సీతాకోక రెక్కలను కట్టుకొని
ఆకాశంలోకి ఎగిరిపోయి ఆ వేదనల నవ్వులను తొక్కెయ్యాలనుకుంటాను నాలోని ఆశలకు ఒక కొత్త ఉదయాన్ని చూపెట్టడానికి ప్రయత్నిస్తూ ఉంటాను

కానీ
ఎప్పటికప్పుడు
కొత్తదనం దుప్పటిని కప్పుకునే
ఈ పితృస్వామ్యం
నా చూపులకి గంతలుకట్టి
అంతుచిక్కని చీకటి బావిలోకి
తోసేస్తూ ఉంటుంది
నేను నేర్చిన అంకెలకు కూడా
ఆ లోతు అంతుబట్టకుండా చేస్తుంది

పోరాడి, పోరాడి ఓడిపోయిన నేను ముక్కలు ముక్కలుగా తెగిపడిపోతుంటాను వాటి చుట్టూ కూడా నిరంకుశ అహంకార అరాచకాలు ఈగలోలె ముసురుతూనే ఉంటాయి

ఈ నిరంతర యుద్ధానికి చిరునామాగా ఉన్న నేను నా చరిత్రను మళ్ళీ లిఖించుకొని అస్తిత్వాన్ని కాపాడుకోడానికి అలసిన నా మనసు ఫినిక్స్ పక్షిగ మారాలి…

పుట్టిన ఊరు వరంగల్ జిల్లా ఘన్‌పూర్‌ స్టేషన్. కవయిత్రి, ఉపాధ్యాయురాలు. M.Sc (Physics), M.A.(Sociology), B.Ed. చదివారు. రచనలు : ఆమె తప్పిపోయింది(కవితా సంపుటి). స్కూల్ అసిస్టెంట్ (మ్యాథ్స్)గా పనిచేస్తున్నారు. వివిధ పత్రికలు, వెబ్ మేగజీన్ లలో కవిత్వం అచ్చయింది.

One thought on “అలసిన మనసు

Leave a Reply