గాయపడడమంటే
శరీరానికి దెబ్బ తగిలి
నాలుగు నెత్తుటి చుక్కలు
నేల రాలడం కాదు –
ప్రమాదంలో చెల్లాచెదురుగా పడిన మృతదేహాల్లా
బతుకుదెరువుల వలసల్లో
దిక్కుకొకరుగా విసిరేయబడడం –
బతుకుమూటను భుజానికెత్తుకొని
పొట్టకూటికోసం బయలుదేరిన
సంచారజీవులు
నీటిచుక్క కోసం ఇసుక తిన్నెలవెంట సాగే
ఎడారి ఒంటెలా
పూట గడవడం కోసం
గారడీని నమ్ముకొని
ఊరూరా తిరిగే దొమ్మరోళ్ళు –
ఎదుటివాడి మెప్పుకోసం
కొందరు చేసే నానా విన్యాసాలకన్నా
గుప్పెడుమెతుకులకోసం
చౌరస్తాలో నిలబడి
వారుచేసే సాహసాలు చాలా గొప్పవి –
ఆకలి దప్పులు లేకుండాచేసే
విశ్వామిత్రుడి విద్యలు
ముద్దకోసం పోరాడుతున్న
వారికి తెలిసుంటే ఎంత బాగుండేది –
జానెడు పొట్టను నింపుకోడానికి
పట్టుకోల్పోకుండా తీగమీద నడుస్తున్న
పసిపాపను చూస్తే
ఎంతటి వారికైనా సరే
పాప పాదాలకు ప్రాణమిల్లాలనిపిస్తుంది –
జీవం కోల్పోతున్న దేహంలో
జవసత్వాలు నింపడానికి
తనువంతా ఇనుపచట్రంలో ఇరికించి
బయటకుతీసే మహావిద్యముందు
చతుష్షష్టీ కళలన్నీ మోకరిల్లాల్సిందే –
నిత్యం ఆకలి మంటలు
కడుపులో నిప్పుల కొలిమిని రగిలిస్తుంటే
అగ్గితో చెలగాటమాడటం
వారికి పెద్దకష్టమేమీ కాదు –
ప్రాణాల్ని ఫణంగా పెట్టి సాహసాలు చేస్తే
శవయాత్రలో చల్లే చిల్లరపైసల్లా
పావలా, అర్దలు విసిరేసి వెళతారు
దర్జాగాళ్ళు –
తట్టలో పడిన చిల్లర నాణేలను
తనివితీరా చూసుకొని
మరోచోట బతుకాటకు సిద్ధమౌతారు –
అప్పటిదాకా భగభగా మండిన భానుడు
ఆ రోజు కూడా ఎప్పటిలానే
వారిముందు పరాజితుడై
పడమటి కొండల్లో నిష్క్రమిస్తాడు..!
ఆకలి దప్పులు లేకుండాచేసే
విశ్వామిత్రుడి విద్యలు
ముద్దకోసం పోరాడుతున్న
వారికి తెలిసుంటే ఎంత బాగుండేది……
చాల బాగా రాశారు….
నా చిన్నపుడు ఇవి చూసి ఆనందించాను . ఇప్పడు ఆ బతుకు పోరాటం చూడ లేని పరిస్థితి మనం కవిత ల తో ఆగి పోకూడదు .
👌👌👌