( 22 నవంబర్ 2025 న ‘సమూహ’ యువజన సాహిత్య ఉత్సవం సందర్భంగా…)
వేదిక : వీరనారి చాకలి ఐలమ్మ మహిళా విశ్వవిద్యాలయం , కోఠీ , హైదరాబాద్
ఈరోజు మనం అత్యంత సంక్లిష్టమైన కాలంలో జీవిస్తున్నాం. ఒకవైపు సాంకేతికత ప్రపంచాన్ని కుగ్రామంగా మారుస్తుంటే, మరోవైపు సంకుచిత భావజాలాలు మనుషుల మధ్య అగాధాలను సృష్టిస్తున్నాయి. సరిగ్గా ఇటువంటి చారిత్రక సందర్భంలోనే యువత పాత్ర కీలకమవుతుంది. అందువల్లనే ‘సమూహ సెక్యులర్ రైటర్స్ ఫోరమ్’ 2025 నవంబర్ 22న ‘యూత్ లిటరేచర్ ఫెస్టివల్’ (యువజన సాహిత్య ఉత్సవం) జరుప తలపెట్టింది. ఇది కేవలం ఒక ఉత్సవమో, సంబరమో కాదు. వర్తమాన అవసరం, అనివార్యమైన సాంస్కృతిక జోక్యం.
వర్తమాన కాలంలో యువజనోత్సవాలు ఎందుకు?
నేటి సమాజంలో యువతను మొద్దబార్చి దుర్బలపరచే ప్రయత్నాలు అనేకం జరుగుతున్నాయి. వ్యాపార మార్కెట్ శక్తులు వారిని కేవలం వినియోగదారులుగా మార్చేస్తుంటే, రాజకీయ శక్తులు వారిని పావులుగా వాడుకుంటున్నాయి. ప్రశ్నించాల్సిన గొంతుకలు మౌనం దాల్చేలా, లేదా దారి మళ్ళేలా వ్యవస్థీకృత ప్రయత్నాలు జరుగుతున్నాయి. ఇటువంటి సమయంలో యువతకు కావాల్సింది వినోదం కాదు, విచారణ, వివేచన. వారికి కావాల్సింది భ్రమలు కాదు, వాస్తవికత పట్ల అవగాహన. సాహిత్యం ఆ పని చేస్తుంది. సాహిత్య ఉత్సవాలు యువతకు తమ చుట్టూ ఉన్న సమాజాన్ని విమర్శనాత్మకంగా చూసే చూపును అందిస్తాయి. ఇది కేవలం సాహిత్యం, పుస్తకాల పరిచయ వేదిక కాదు, ఒక ప్రత్యామ్నాయ ఆలోచనా విధానానికి పునాది.
సామాజిక ప్రభావం – ఒక ప్రజాస్వామిక అవసరం
యువజనోత్సవాలు సమాజాన్ని ఎలా ప్రభావితం చేస్తాయి? అనే ప్రశ్నకు సమాధానం మన రాజ్యాంగ ఆశయాల్లోనే ఉంది. భిన్నత్వంలో ఏకత్వాన్ని, లౌకిక ప్రజాస్వామిక విలువలను కాపాడుకోవాలంటే నిరంతర సంభాషణ అవసరం. సాహిత్యం అటువంటి సంభాషణకు వీలు కల్పిస్తుంది. యువత ఎప్పుడైతే కథో, కవితో, వ్యాసమో చదువుతారో, వారు తమ పరిధి దాటి ఇతరుల జీవితాల్లోకి పరకాయ ప్రవేశం చేస్తారు. దళిత, బహుజన, మైనారిటీ, స్త్రీ జీవితాల అస్తిత్వ వేదనను అర్థం చేసుకునే సహానుభూతి (Empathy) వారిలో పెరుగుతుంది. తద్వారా సమాజంలో అసహనం తగ్గి, సంఘీభావంతో కూడిన ప్రజాస్వామిక విలువలు బలపడతాయి. ద్వేషం సులువుగా వ్యాపిస్తున్న ఈ రోజుల్లో, ప్రేమను, సహజీవనాన్ని నేర్పే సాహిత్య వేదికలు సమాజ ఆరోగ్యానికి అత్యవసరం.
అంతర్జాతీయ అనుభవాలు – ఒక చారిత్రక సాక్ష్యం
ప్రపంచ చరిత్రను గమనిస్తే అనేక విప్లవాత్మక మార్పుల్లో యువ సాహిత్యకారులదే కీలక పాత్ర. లాటిన్ అమెరికాలో నియంతృత్వాలకు వ్యతిరేకంగా జరిగిన పోరాటాలైనా అమెరికాలో వియత్నాం యుద్ధ వ్యతిరేక ఉద్యమమైనా యూరప్‌లో జరిగిన విద్యార్థి ఉద్యమాలైనా వాటన్నింటికీ చోదక శక్తిగా నిలిచింది సాహిత్యమే. అంతర్జాతీయ యువజనోత్సవాలు కేవలం కళా ప్రదర్శనలు కాదు, అవి భావజాలాల సంఘర్షణకు కూడళ్ళు. వేదికలు. కొత్త ప్రపంచాన్ని స్వప్నించే ఆలోచనలకు వాకిళ్ళు. అవి యువతలో అంతర్జాతీయ దృక్పథాన్ని సార్వజనీన పౌర భావనను పెంపొందిస్తాయి, తమ స్థానిక సమస్యలను ప్రపంచ కోణంలోంచి చూసే వెసులుబాటును కల్పిస్తాయి.
తెలుగు నేలలో ఆవశ్యకత
మన తెలుగు నేలకు గొప్ప ప్రగతిశీల సాహిత్య చరిత్ర ఉంది. కానీ నేడు ఇక్కడి విద్యావ్యవస్థ పూర్తిగా కార్పొరేటీకరణ చెంది, విద్యార్థులను కేవలం మార్కులు, ర్యాంకులు సాధించే యంత్రాలుగా మార్చేసింది. మానవీయ శాస్త్రాలు (Humanities), సాహిత్యం పట్ల చిన్నచూపు పెరిగింది. ఫలితంగా ఒక సామాజిక స్పృహ లేని తరం తయారవుతోంది. ఈ నేపథ్యంలో, మళ్ళీ తెలుగు నేల మీద యువతను పుస్తకం వైపు, ఆలోచన వైపు మళ్ళించాల్సిన గురుతర బాధ్యత మనందరిపైనా ఉంది.
‘సమూహ’ ఎందుకు తలపెట్టింది?
‘సెక్యులర్’ (లౌకిక) అనే పదం కేవలం ఒక రాజ్యాంగ పదం కాదు, అది ఈ దేశపు జీవనాడి. నేడు ఆ విలువలు ప్రమాదంలో పడ్డాయి. రచయితలు ఎప్పుడూ ప్రతిపక్షమే. మనుషుల మధ్య విభజన రేఖలు గీసి అడ్డు గోడల్ని కడుతున్న చోట వాటిని ఛేదించాల్సిన బాధ్యత రచయితలది. ‘సమూహ సెక్యులర్ రైటర్స్ ఫోరమ్’ ఈ ఉత్సవాన్ని నిర్వహించడం వెనుక ఉన్న ప్రధాన ఉద్దేశం ఇదే – యువతను మతతత్వ, కులతత్వ శక్తుల బారిన పడకుండా, వారిని విశాల మానవతావాదం వైపు నడిపించడం.
చివరగా నవంబర్ 22న జరగబోయే ఈ యువజన సాహిత్య ఉత్సవం ఒక రోజు కార్యక్రమంగా ముగిసిపోకూడదు. అది యువతలో రేకెత్తించే ఆలోచనలు, భవిష్యత్తులో ఒక బలమైన సాంస్కృతిక ఉద్యమంగా మారాలి. ప్రశ్నించే తత్వాన్ని, నిలదీసే ధైర్యాన్ని, అన్నింటికీ మించి తోటి మనిషిని ప్రేమించే గుణాన్ని ఈ ఉత్సవం యువతకు అందిస్తుందని ఆశిద్దాం.
రండి..మీ స్వరం తీసుకురండి..మీ గుండెను తీసుకురండి..మీ కలం తీసుకురండి..
ఈ సాహిత్య ఉత్సవంలో భాగం అవ్వండి.
మాకు గోడల్లేవు, గోడలు పగలకొట్టడమే మా పని ..
– సమూహ సెక్యులర్ రైటర్స్ ఫోరమ్
- మెర్సీ మార్గరెట్
సమూహ సెక్యులర్ రైటర్స్ ఫోరమ్
కార్యవర్గ సభ్యురాలు
